Guddoonka Golaha shacabka ee Baarlamaanka Soomaaliya ayaa laba qeybood u kala jabay kadib mooshin kalsooni kala noqosho oo saaka ay xildhibaanno ka badan 100 ka gudbiyeen guddoomiyaha golaha Maxamed Sheekh Cismaan (Jawaari).
Guddoomiyaha Baarlamaanka ee mooshinku ka yaallo, guddoomiye ku xigeenka labaad iyo guddiga joogtada ah oo intooda badan uu soo xulay guddoomiye Jawaari ayaa dhinac kasoo jeeda oo sharci darro ka dhigay mooshinka Jawaari, halka guddoomiye ku xigeenka koowaad C/weli Sheekh Muudey uu gaar u taagan yahay keligiis, isla markaana u sharci ka dhigay mooshinka Jawaari.
Xaaladda aya saqdii dhexe ee caawa kasii dartay markii C/weli Muudey ku dhawaaqay inuu sharci yahay mooshinka Jawaari, isla markaana isagu guddoomiye u yahay Baarlamaanka inta uu meel ka dhacayo mooshinka ka yaalla guddoomiyaha.
Dhinaca kale xildhibaannada taageersan Guddoomiye Jawaari ayaa dhameystiraya Caawa mooshin ay hore u bilaabeen oo ku saabsan kalsooni kala noqoshada xukuumadda Xasan Cali Kheyre.
Xaaladda ayaa gaartay halkii ugu sareysay iyadoo habeenkii labaad caawa aan laga seexan Muqdisho, waxaana xaaladan ay qaraxday kadib markii uu Baarlamaanka sharci darro ka dhigay shirkadda DP World ee Imaaraadka.
