Koox dhalinyrro ah ayaa xalay eeraray hoyga uu magaalada Hargeysa ka degan yahay musharaxa madaxweynaha ee xisbiga mucaaradka ee Waddani Cabdiraxman Maxamed Cabdillahi Ciro .
Gudoomiyaha kumeel-gaarka ee xisbiga waddani Cabdilqaadir Ismmaaciil jirde ayaa sheegay in koox dhallinyaro ah ay xalay soo weerareen guriga Cabdiraxman Ciro. iyagoo dhagxaan fara badan roobka uga dhigay guriga kuna dhaawacay askari ilaalo ka ahaa.
Cabdilqaadir ayaa waxaa kale oo uu sheegay in dhallinyaradaasi ay ku tuhmayaan inay soo abaabuleen cidda tartanka doorashada uu kala dhexeeyo, wuxuuna intaa ku daray in dhalinyaradaasi ay dhagax ku dhaawaceen askari ka mid ah ilaalada guriga.
Taliyaha guud ee ciidammada boliiska ee Somaliland Jeneral Cabdillahi Fadal iimaan ayaa sheegay in falkaasi loo soo qabtay afar dhallinyaro ah iyo baabuur, haatan ay wadaan baaritaan ku aadan arrintaasi, wuxuuna ugu baaqay xisbiyada inay xakameeyaan taageerayaashooda gaar ahaan dhallinyarada, isagoona intaa raaciyay in booliska ay gacan bir ah ku qaban doonaan cid kasta oo ku kacda fal noocaasi oo kale ah.
Jeneral Cabdillahi Fadal iimaan ayaa sidoo kale sheegay in isla xalay ay qabteen dhallinyaro weerartay xafiis xisbiga kulmiye uu ku leeyahay xaafadda Sheekh Madar ee magaalada Hargeysa .
Guud ahaan magaalooyinka jamhuuriyada iskeed ugu dhawaaqday madaxbanaanida ee Somaliland ayaa waxaa dhowrkii maalmood ee lasoo dhaafay ka socday ololaha siyaasada ee xisbiyada ku loolamayo doorashada lagu wado inay Somalialnd ka dhacdo 13-ka bisha Novembar.
