Looma kala harin soo dhoweyntiisa, muujinta jaceylka loo qabo iyo sida dadku guud ahaan u doonayeen inuu isbedel dhaco, siiba inuu madaxweyne noqdo Maxamed C/llaahi Farmaajo.
Damaashaadku wuxuu gaaray “AR FARMAAJO II GEEYA…” soo dhoweyntu waxay gaartay in sarifka Doolarku hoos u dhaco, shilinkii Soomaaliga ahaana u maleeyo inuu helay dowlad dib ula wareegta xanaaneyntiisa, Kalsooniduna waxay mareysaa in ciidan iyo shacab ay is dhex galaan.
Waxaas oo dhan waa caadi inay dhacaan, maxaa yeelay dadka uu madaxweynaha u noqday Farmaajo waa kuwo ka niyad jabay SIYAASI oo dhan, soona tijaabiyay Hogaamiye kooxeed, Wadaad, Askari iyo rayid oo kulligood ku fashilmay inay dalkan hore u wadaan oo halkii hiraalku ahaa geeyaan.
Damaashaadyadu ma dhammaan, dadka gudaha toddobaad gudihiis ayay ku daali doonaan, jaaliyaddaha dibadda ayaa kala wareegi doona oo bil iyo ka badan sii wadi doona xaflado iyo soo dhoweynta madaxweynaha la doortay laakiin xaqiiqadu aad ayay uga duwan tahay.
Xilka madaxweynenimo ee Soomaaliya uma sahlana sida loo wada raadinayo, dal xaaladiisu sida Soomaaliya oo kale tahayna laguma hogaamin karo shacbiyad iyo damaashaad qura. Villa Somalia waxay liqday rag badan oo iyagoo u hamuun qaba kursigan sii joogi waayay.
Farmaajo imtixaanka koowaad ee horyaala wuxuu la bilowday intuu musharax ahaa, wuxuuna socon doonaa muddo bil ah oo ka bilaabata markii la dhaariyay, haddii aanu waqti kale u baahan.
Hal-xiraalaha horyaala madaxweynaha la doortay wuxuu noqon doonaa sidii uu u magacaabi lahaa iyo qofka uu ka dhigi lahaa WASIIRKA KOOWAAD ee xukuumadda Soomaaliya. Waa halka dowladiisu ka toosi doonto ama u dhutin doonto.
Waa halka ay dowlado badan oo hore ka naafoobeen, waxqabadkooduna u noqday mid lagu hungoobay, waxaa la wada sugayaa go’aanka ugu horeeya ee masiiriga ah oo uu qaadan doono Mudane Madaxweyne Farmaajo iyo shaqsiga uu u soo xulan doono inuu hogaamiyo waaxda fulinta ee dowladda cusub.
Musharaxiintu ka yara, beelaha is heysta ee wada doonaya ma aha kuwo la kala sooci karo, waxayna noqon doontaa mid madaxweynaha lagu qiimeyn doono halka ay gaarsiisan tahay qaangaarnimadiisa siyaasadeed iyo miisaankiisa qofnimo.
Marka aad eegto dhalinyarada ku wareegsan Farmaajo ee khibradoodu aadka u yar tahay waxaad u maleyneysaa in xilkani ka weyn yahay, mar kalena waa lagu doodi karaa inay mudan yihiin in fursad la siiyo meeshii ay la gaartaba.
Dadka faraha badan ee hor tuban xafiiska madaxweynaha cusub iyo kulamada aan dhammaadka lahayn ee habeen iyo maalin socda waxaa intooda badan lagu doonayaa xilal siyaasadeed, waxayna kuwa u ordaya u badan yihiin kuwii hore u rogay dowladihii isaga danbeeyay dalka ee raadkoodu sii muuqdo.
FAALLADDA GOOBJOOGE.COM
