Idaacadda Shabeelle ee magaalada Muqdisho ayaa si weyn u kordhisay weerar dhinaca Warbaahinta ah oo ay kula jirto AMISOM.
Arrintan ayaa kasii dartay markii AMISOM ay war-saxaafadeed ku sheegtay in Idaacaddan ay been abuur iyo sumcad dilis la daba taagan tahay, soona qaadatay kiis ku saabsan dhaawaca haweeney uur lahayd oo ka dhacay Gobolka Sh/hoose, kaasoo AMISOM sheegtay inay ku dhaawacantay Miino jidka la dhigay iyo Shabeelle oo ku doodeysa in rasaas ay fureen AMISOM ay ku dhaawacantay.
HOOS KA AKHRISO JAWAABTA IDAACADDA SHABEELLE IYO CADDEYMAHEEDA
9kii bishaan July war ay baahishay Shabakada Warbaahinta Shabelle oo ahaa in hooyo Soomaaliyeed oo Uur laheyd ay ku dhaawacantay Rasaas ay fureen Ciidanka Amisom kaddib qarax Gaadiidkooda lagula beegsaday Deegaanka Arbacoow ee duleedka Muqdisho ayaa Taliska Ciidanka AMISOM ay ku sheegeen Been Abuur ay soo dhoob-dhoobtay Idaacadda Shabelle.
AMISOM intaa kuma Ekaan ee warka ay soo saareen waxaa lagu sheegay in Shabakada Warbaahinta Shabelle ay ka shaqeyneyso isku dirka howlgalka AMISOM iyo Shacabka Soomaaliyeed, islamarkaana la sumcad dilayo howsha ay hayaan.
Taliska AMISOM waxa ay ugu horeyn Qirteen in uu sax yahay qaraxa Ciidankooda lagula eegtay Deegaanka Arbacoow, waxa kaloo ay Xaqiijiyeen in Hooyo Soomaaliyeed oo Uur leh ay ku waxyeelowday halkaas.
Laakiin waxa ay ku doodayaan in Hooyadan Soomaaliyeed aysan ku dhicin Rasaasta ay rideen Ciidanka AMISOM, balse ay ku dhaawacantay firirka Qaraxii gaarigooda lala eegtay.
Shabelle oo iska beri yeeleysa Hadalka AMISOM waxa ay cadeymo dheeraad ah u keentay falka Guracan oo AMISOM ay kula kacday Hooyadaan oo iminka dhibane u ah dhaawaca ay u geysteen Ciidamada AMISOM.
Hooyadaan oo lagu Magacaabo Sacdiyo Maxamuud Dheere ayaa hada lagu dabiibayaa Isbitaal ku yaalla Magaalada Muqdisho, waxana ay dadka Soomaaliyeed u cadeyneysaa halka Xabada Ciidanka AMISOM uga dhufteen, iyadoo dareen murugo leh ku sheegtay in canuugeedii ay Uurka ku siday uu Rasaastaasi ku dhintay.
sidoo kale Hooyadaan ayaa ka codsatay Masuuliyiinta Sar sare ee dowladda Federaalka Soomaaliya in arrinteeda ay soo fara geliyaan loogana soo dhiciyo Ciidamada AMISOM xuquuqdeeda kadib Rasaasta ay huwiyeen.
Shabakadda Warbaahinta Shabelle ayaa sidoo kale heysa Raajo Caadeyneysa in Ciidamada AMISOM Rasaas ay huwiyeen Haweeneydaas ay ku dhaawacantay islamarkaana uu ku geeriyooday Uurkii ay siday.
Waxaan kaloo heynaa Warqad Caafimaad oo AMISOM ay siiyeen Hooyadaasi iyagoo qirsan in Rasaasta ay fureen Ciidamadeeda ay wax ku noqotay, walow qiil kale ay u yeeleen kadibĀ markii Shabelle ay baahisay dhacdadaas oo Argagax galisay dadka daneeya arrimaha Xuquuqda Aadanaha ee gudaha iyo dibadda ku kala nool. .
Waxaana Shabelle ay faafineysa warqaddaasi ay kuĀ qirteen in Ciidamadooda ay waxyeeleeyeen Hooyadaas.
