Waxaa si weyn loo adkeeyay amniga magaalada Muqdisho, iyadoo saaka la xiray wadooyinka muhiimka ah ee gala, kana baxa Xarunta Madaxtooyada ilaa Garoonka Diyaaradaha Caasimadda xilli la sugayo inay magaalada yimaadaan Madaxweynayaasha maamul Goboleedyada Puntland iyo Jubbaland.
Siciid C/llaahi Deni iyo Axmed Maxamed Islaam oo isbaheysi siyaasadeed leh ayaa iska soo hor mariyey ciidamo badan iyo mas’uuliyiin kala duwan, waxaana guryo ku dhow Madaxtooyada loo diyaariyey inay degaan labadan mas’uul, taasoo qaadatay waqti.
Isbedelka ku dhacay Muqdisho ayaa la mida tallaabooyinkii la qaadi jiray xilliyada ay dalka imaanayaan wafdiyada heerka sare ah ee ajnabiga ah, waxaana la joojiyey gaadiidka, iyadoo dadka lagu qasbay inay lugeeyaan.
Dooda weyn ayaa hareysay baraha bulshada oo ku saabsan sababta keentay in Siciid Deni iyo Axmed madoobe loo xiro wadooyinka magaalada, iyadoo aan sidaasi loo sameyn madaxda kale ee maamul Goboleedyada, waxaana garoonka Muqdisho la isugu geeyay dadweyne iyo mas’uuliyiin sita calamada labada maamul Goboleed oo soo dhoweyntaa ka qeyb galaya.
Madaxweyne Maxamed C/llaahi Farmaajo ayaa ku qasbanaaday inuu Muqdisho ku casuumo madaxweynayaasha Puntland iyo Jubbaland oo ka hor yimid heshiiskii uu Doorasho ee uu la gaatay madaxda maamul Goboleedyada kale ee taageersan, waxaana kulanka saddex geesoodka ah ee Muqdisho looga hadli doonaa dhammeystirka heshiiska Doorashada muranka ka taagan yahay ee dalka.
