Faahfaahin dheeraad ah ayaa kasoo baxeysa Bamka ugu weyn caalamka oo markii ugu horeysay shalay loo adeegsaday Godad ku yaala dalka afghanistan oo la sheegay inay kooxda Daacish qodatay.
Wasaaradda gaashaandhigga Afghanistan ayaa bayaan ay soo saartay ku sheegtay in bamkaas lagu dilay 36 ka mid ah dagaalyahanada kooxda Daacish, laguna burburiyey hub fara badan.
Diyaarad dagaal oo Mareykanka uu leeyahay ayaa bamkii ugu weynaa hubka Mareykanka – oo culeeskiisu yahay 10,000 oo KG, loona yaqaan hooyada bambooyinka oo idil– ku riday dhisme dhulka hoostiisa ku yaalla oo kooxda Daacish ay ku leedahay gobolka Nangarhar ee dalka Afghanistan.
Bayaanka ayaa lagu sheegay inaysan jirin wax khasaare ah oo shacabka kasoo gaaray weerarkan.
War kale oo kasoo baxay xafiiska madaxweynaha Afghanistan Ashraf Ghani ayaa lagu sheegay in howlgalka uu ku dhacay wadashaqeynta ciidamada amniga iyo difaaca Afghanistan.
Bamkan oo la sameeyey in ka badan 10 sano ka hor ayaan marnaba loo isticmqalin dagaal hadda ka hor, waana bamka ugu weyn kuwa aan nuclear-ka ahayn ee Mareykanka uu haysto.
Madaxweynihii hore ee Afghanistan Hamid Karzai ayaa cambaareeyay bambada weyn ee dalkiisa lagu tijaabiyay isagoo sheegay inaysan jirin baahi loo qabay arrintan.
