Wakiilka Qaramada Midoobay u qaabilsan Soomaaliya James Swan ayaa war kasoo saaray weerarradii Alshabaab salay ku qaadeen saldhigyada ciidamada Soomaaliya ee Gobolka Sh/Hoose.
James Swan ayaa bogaadiyey naf-hurnimada ay sameeyeen ciidamada Soomaaliya iyo sida geesinimada leh ee ay u badbaadiyaan Soomaaliya iyo dadkeeda, wuxuuna ka tacsiyadeeyay askartii ku dhintay dagaalka.
Madaxweynaha xilkiisu dhammaaday ee xafiiska fadhiya Maxamed Farmaajo ayaan weli ka hadlin dagaaladii ka dhacay Sh/hoose iyo qarax dhalinyaro badan ku dilay magaalada Muqdisho, iyadoo taliyaha ciidamada Xoogga dalka uu sheegay in 14 askari ay ciidamada Soomaaliya uga dhinteen weerarradii Alshabaab ee shalay.
HOOS KA AKHRISO WARKA KASOO BAXAY WAKIILKA Q/MIDOOBAY JAMES SWAN
Wakiilka Gaarka ah ee Xoghayaha-Guud ee QM u qaabilsan Soomaaliya, James Swan, ayaa cambaareeyay weeraradii shalay lagu qaaday fariisimaha Ciidanka Xoogga Dalka Soomaaliyeed ay ku leeyihiin magaalooyinka Bariire iyo Awdhegle ee gobolka Shabeellaha Hoose.
“Waxaan si adag u cambaareyneynaa weeraradan lagu bartilmaameedsaday ciidamada Soomaaliya. Tani waa mid si cad inoo xusuusinaysa naf-hurnimada maalin kasta ay sameyaan askarta Soomaaliyeed ee sida geesiminada leh u dagaallama si ay u badbaadiyaan Soomaaliya iyo dadkeedaba,” ayuu yiri Md. Swan. “Waxaan ka tacsiyeynaynaa dadkii ku dhintay, waxaana caafimaad deg deg ah u rajeynaynaa dadkii ku dhaawacmay.”
Al-Shabaab ayaa sheegatay mas’uuliyadda weerarada, waxaana lagu soo waramayaa in qasaaro lixaad leh uu ka soo gaaray talaabada adag ee ay qaadeen Ciidanka Xoogga Dalka Soomaaliyeed.
