Xildhibaanada la baxay Madasha Horeusocod ee dhowaan looga dhawaaqay magaalada Nairobi ayaa la ogaaday tiradooda dhabta ah ee ay ka kooban yihiin.
Xildhibaanadan ayaa hore loo sheegay inay gaarayaan 100 xildhibaan, waxaa kaloo warbaahintu shaacisay inay dhan yihiin 80 xildhibaan, laakiin shirkoodii magaalada Muqdisho ee Khamiistii ayay kasoo muuqdeen 10 xildhibaan oo qura.
Xildhibaanada ka qeyb galay shirkii Muqdisho ayaa intooda badan kuwo aan caab ahayn oo looga baran siyaasadda, marka laga reebo guddoomiyahooda C/rashiid Xiddigna waxaa ka dhex muuqday agaasime ku xigeenkii madaxtooyada ee dowladii Xasan Sheekh xildhibaan Saadaq C/kariin.
Ilo xogogaal ah ayaa Wadani.com u sheegay in tirada guud ee xildhibaanada Horeusocod ay tiradoodu tahay ilaa 20 xildhibaan oo aanay waxba ka jirin tirooyinka badan ee hore loo shaaciyay.
“Ma jirto 20 xildhibaan oo Nairobi isugu timid ma jirto, wax shir ah oo Nairobi ka dhacay oo rasmi ahna ma jiraan.. transit ayaan ku ahayn oo xildhibaano safar ku socday iyo kuwo kasoo socday..” ayuu yiri C/rashiid Xiddig oo galabta ka qeybgalay barnaamijka dooda Jimcaha ee VOA-da.
Xildhibaanada kasoo haray, kuwii kasoo dhex muuqday shirkii Khamiistii ee Muqdisho ayaa ah wasiiro ka tirsanaa dowladii Xasan Sheekh oo si gaara ugu dhowaa madaxweynihii hore ee Xasan Sheekh, kuwaasoo aan dooneyn inay saxaafadda kasoo muuqdaan.
Wadani.com
