Doorashadii xubnaha Aqalka Sare ee maamulka Hirshabeelle ayaa markale dib ugu dhacday galabta arrin la yaab leh.
Xildhibaanada Hirshabeelle ayaa diiday inay tagaan fadhiga baarlamaanka, iyadoo ay harsanaayeen musharixiin aan la macaamilin xildhibaanada isla markaana bixin lacagtii laaluusha kursiga oo ay sharciyeysteen.
Guddoomiyaha Baarlamaanka iyo xildhibaano yar ayaa ku sugnaa xarunta doorashada ka dhici lahayd, halka inta badan xildhibaanada ay wadeen waanwaan iyo olole doorasho oo ay la galeen musharixiinta u taagan Aqalka sare si ay kharash uga helaan.
Musaharixiinta maamulka Hirshabeelle ayaa si ka duwan xildhibaanada maamul goboleedyada iyagoo wada jira ka dalbanaya lacag musharixiinta, iyadoo kursiga aqalka sare uu magaalada Jowhar ka gaaray lacag dhan 3000 doolar.
Xildhibaano ka badan 70 ayaa musharax waliba laga rabaa inuu siiyo lacag, taasoo keentay waqti badan ku lumo ololaha doorashada oo ka socday goobo kala duwan, musharixiinta qaarkood ayaa isaga haray tartanka, halka kuwo kalena la waayay, waxayna arrintan rikoor cusub oo xildhibaanada Hirshabeelle u dhigeen iibsiga codadkooda, inkastoo doorashooyinka ka dhaca ay ku dhisan yihiin cod kala iibsiga.
Guddoomiyaha baarlamaanka maamulka Hirshabeelle Shiikh Cismaan Barre Maxamed ayaa caawa ku dhowaaqay in dib u dhac kale ku yimid doorashada Aqalka Sare, isagoo u sheegay xildhibaanadii soo xaadiray in Arbacada berito ay dhici doonto doorashada.
Wadani.com
