Kadib markii mar qura lagu soo baraarugay waaberigii 14-kii bishan Mooshinka laga keenay guddoomiyaha Baarlamaanka Maxamed Sheekh Cismaan (Jawaari) ayaa su’aal weyni ka timid cidda ka danbeysa mooshinka..?
Dadka qaarkood ayaa dusha u saaray xukuumadda xilka heysta sida guddoomiyaha mooshinka laga keenay, halka qaar kale la aadeen DP World iyo Imaaraadka, waxaana jira kuwo oo meelo aan munaasib ahayn la aaday, haddana waxaan qormadan ku eegeynaa halka uu ka yimid mooshinkan iyo cidda xaqiiqo ahaan uga danbeysa.
BILOWGII MOOSHINKA
Mooshinkan wuxuu soo bilowday afar bilood ka hor oo ku beegneyd Novermbar 2017 [Akhri Warkan], waxaana markaasi waday xildhibaanno labaatameeyo ah oo u badan odayaal hore oo ay Jawari isku qabteen dhismaha Guddiyada Baarlamaanka.
Mooshinka Jawaari wuxuu weligiis ahaa mid ay ku riyoon jireen xildhibaanno laga dhex yaqaan Baarlamaanka oo xaalado gaara kala dhaxeeyaan Jawaari, waxaana marka ku biirayey xubno ay is qabteen Jawaari.
Xildhibaannada saxiixay Novembar 2017, waxay kala ahaayeen:
1- Xildhibaanno dood ka qaba qaabka loo dhisay Guddiyada joogtada ah oo xilal ka waayey Guddiga.
2- Xildhibaano Jawaari ku heysta inuu ku dari waayey xildhibaanno safarro dibadeed helay ama qaar loo diray shirar dibadda ah.
3- Xildhibaanno si shaqsi ah ula dirirsan Jawaari oo arrimo ay dhex mareen ama codsiyo gaara uu ka diiday.
Waxaa kadib ku biiray xildhibaannada taageersan madaxweynha K/Galbeed Shariif Xasan Sheekh Aadan oo isagu muddo dheer loolan kala dhaxeeyay Jawaari, ujeedkiisuna yahay in qof isaga taabacsan ay xilkaasi qabato.
Mooshinka Jawaari ma ahayn mid arki kara nolol uu mooshin sax ah ku noqdo, iyadoo dadka saxiixay aysan dhaafin 30 ilaa 40 xildhibaan markii ay ugu badnaayeen ay ku dhowaadeen 50 laakiin maxaa isbedelay..?
MOOSHINKA CUSUB
Mooshinka ay saxiixeen 107 xildhibaan ee Arbacadii 14-kii Bishan la shaaciyey wuxuu dhashay soona baxay muddo 8 saacadood gudahood ah, kadin markii ku soo jabeen taageerayaasha xukuumadda Soomaaliya oo wasiiro iyo xildhibaanno isugu jiray, waxaana suuragashay in habeenkii iyo subaxii Arbacadda ay tirada mooshinka saxiixday gaarto in ka badan 100.
MAXAA DHACAY..?
Waxaa laga war helay jiritaanka Mooshin laga wado xukuumadda, taasoo ku qasabtay dhinaca kale inay isugu tagaan mooshinka Jawaari si ay uga hortagaan mooshinka xukuumadda, waxayna arrinta oo dhami noqotay “BIYO INTA AY KU SOO GAARIN AYAA LA ISKA MOOSAA..” taasoo micnaheedu yahay in cabsi ay xukuumadda ka qabto mooshin lagu keeno ay uga hordhacday, iyadoo gaashaan ka dhiganeyso Mooshinka Jawaari.
Dad badan ayaa aaminsan in Mooshinka Jawaari uu ahaa QAR ISKA TUURNIMO SIYAADEED oo ay ku kaceen madaxda xukuumadda iyo madaxtooyada, iyadoo aan laga fekerin waxa ka dhalan kara iyo xaaladda dalku geli karo mooshinka noocasi ah.
Xaqiiqada mooshinka ka yaalla Jawaari waa mid ku kooban xukuumad isku difaaceysa qalalaase siyaasadeed iyo Mooshin, waana taariikh cusub oo soo korortay, taasoo ah xukuumada mooshin wada, laakiin waxaa xaqiiqo kale ah in si kasta oo loo maareeyo mooshinkan uu salfan doono laba ama mid ka mida saddexda mas’uul ee ugu sareeya dowladda Federaalka, xaaladuna aanay marna sidii hore iska ahaan doonin. YAASE KU BIXI DOONA..?
WAR CUSUB: Mooshin laga keenay Guddoomiyaha Baarlamaanka Soomaaliya Prof. Jawaari
