Doorashadii Aqalka Sare ee ka socotay magaalada Jowhar ee maamulka Hirshabelele ayaa dib u dhac ku yimid maanta, kadib khilaaf ka dhashay kursi aan caadi ahayn oo loolan weyn ka taagan yahay.
Wararka aya sheegaya in kursigan oo lagu waday in shalay ilaa xalay la doorto ayaa dib u dhacay markii muran ka dhex dhasay xildhibaanada iyo xubno ka mida guddoonka Baarlamaanka Hirshabeelle.
Waxaa kursigan u sharxan Musharaxiinta kala ah: Xasan lidow Muxamed (Kobac), Cusmaan Axmed Macow iyo Cabdinuur Ibraahim Nuur, waxaana la sheegay inuu yahay kursi tartan xoog leh loogu jiro oo kharash badan lagu kala qaadanayo.
Guddoomiye ku xigeenka kowaad ee Baarlamaanka Hirshabelle Siraaji Sheekh Isxaaq ayaa la sheegay inuu hor istaagay qabashada doorashada kursiga, waxaan gacanta ula tegay qaar ka mida xildhibananada Hirshabeelle oo ku eedeeyay inuu la jiro mid ka mida xildhibaannada.
Ganacsade Xasan Kobac ayaa loo saadaalinayaa inuu dhaqaale ahaan ku guuleysan karo kursigan, kadib markii uu kharash badan u huray, gacantiisuna ay gaartay madaxda Hirshabelle iyo xildhibaannada Baarlamaanka, waxaana tartan adag kula jira Musharax C/nuur Ibraahim.
Wararka aya asheegaya in Musharax C/nuur uu ka danbeeyay dib u dhaca doorashada kursigan, iyadoo ay tahya markii labaad ee uu kursigan isu sharxo oo dhaqaale badna ku bixinayo.
Senator Cusmaan Macow ayaa u muuqda inuusan kursigan difaacan karin marka la eego ragga dhaqaalaha badan wata ee tartanka kula jira, waxaana rajadiisa lagu sheegay in mid hooseysa.
Baarlamaanka Hirshabeelle ayaa lasoo baxay dhaqan ah in maalin cad ololaha doorashada la galo, si aan qarsoodi ahayn lacagta loo kala qaato, kadibna doorashada habeenkii la qabto, taasoo noqotay wax aan hore loo arag.
