Waxaa Magaalada Baydhabo socota doorashada kursiga tirsigiisu yahay HOP#103 oo ay shalay hakiyeen Guddiga Doorashada Hee Federaal, kadib markii ay diideen Guddiga Doorashada Koonfur Galbeed.
Kursigan waxaa laga hor istaagay inuu u taratamo Guddoomiyihii hore ee Golaha Shacabka Prof. Maxamed Sheekh Cismaan Jawaari, balse guddiga doorashooyinka Koonfur Galbeed ay ku adkeysteen in la qabanayo doorashadiisa, markii ay amar ka heleen madaxweynaha K/Galbeed C/casiis Laftagareen.
Kursiga muranku ka taagan yahay ee HOP#103 oo doorashadiisa ay goor dhoweyd soo dhammatay waxaa kusoo baxay Maxamed Cali Xasan oo ahaa Wasiirka Wasaarada Howlaha Guud Koonfur Galbeed, kaasoo uu watay Madaxweynaha K/Galbeed, iyadoo uu la tartamay Mukhtar Cali Ibraahim.
Natiijada codeynta ayaa lagu sheegay in 78 cod uu helay Maxamed Cali Xasan, halka Mukhtar Cali Ibraahim uu helay 18 Cod, waxaana Xumaaday 4 Cod.
Kuraasta kale ee Doorashadooda ka dhaceyso Baydhabo ayaa waxaa ka mida:
Kursiga HOP189: oo uu horay ugu fadhiyay Sheekh Aadan Madoobe
HOP041: oo uu ku fadhiyo hadda Idiris Cabdi Dhaqtar
& Kursiga HOP042 oo ay horay ugu fadhisay Hani Maxamed Aadan.
