Ra’iisal wasaaraha cusub ee Soomaaliya Maxamed Xuseen Rooble oo shalay codka kalsoonida ka helay Baarlamaanka Federaalka ayaa isla xalay bilaabay kulamo is daba joog ah oo uu la yeelanayo siyaasiyiin iyo mas’uuliyiin kala duwan.
Kulankii koowaad wuxuu la yeeshay Guddoomiyaha iyo gudoomiye ku xigeenka Baarlamaanka Maxamed Mursal Sheekh iyo C/weli Ibraahim Muudey, oo ay ka wadahadleen xukuumadda uu soo dhisayo iyo howsha hortaalla.
Kulan dareen gaara yeeshay wuxuu ahaa kulankii uu Ra’iisal wasaaraha ku casuumay siyaasiga C/raxmaan C/shakuur Warsame oo xaalad adag kala dhaxeysay madaxda dowlada Soomaaliya, iyadoo ahayd markii ugu horeysay ee siyaasigaasi uu tago Villa Somalia.
Ra’iisal wasaare Rooble wuxuu isla maanta kulamo wadatashi ah la yeeshay, madaxweynayaasha Hirshabeelle Maxamed Cabdi Waare iyo Jubbaland Axmed Maxamed Islaam, waxaana lagu wadaa inuu sidoo kale la kulmo madaxda kale ee mucaaradka iyo madxdii hore ee dalka.
Wxuu hore ula kulmay Madaxweynaha Galmudug Axmed Cabdi Kaariye, xildhibaanno iyo siyaasiyiin ka tirsan Beeshiisa.
