Madaxweynaha dowladda Federaalka Soomaaliya ayaa magacaabay xisaabiyaha guud ee Qaranka iyadoo wareegto aan dokumenti ahayn oo qoraal ah lagu shaaciyay Radio Muqdisho shalay oo sidoo kale aan wax taariikh ah ka muuqan. Qoraalkaas ayay saxaafadu baahisay iyadoo aan dib loo eegin.
Wadani.com oo raadraac ku sameysay wareegtada ayaa waxaa u soo baxday:
Mas’uulka la magacaabay wuxuu xilkan hayay muddo ku dhow sanad, isagoo ku shaqeynayay inuu yahay “XISAABIYAHA GUUD EE QARANKA”, Waxaana la yaab leh inuusan xilligaasi jagadaas u magacawneyn ee uu kusime uun ahaa, kadib markii mas’uulkii loo magacaabay Dr. Cismaan Cilmi Guuleed (Biikolo) uu soo xaadiri waayay.
Qoraalada uu soo saari jiray Axmed Yuusuf Muumin (Siraaji) waxaa ku caddeyd inuu yahay xisaabiye guud (Halkan ka akhri), waxayna tani caddeyn u tahay sida xilalka dowladda loogu takri falo oo qof aan sharci u lahayn uu ku shaqeyn karo xil dowladeed.
Magacaabidda madaxweynaha ayaa soo baxday kadib markii taageerayaasha Axmed Yuusuf Muumin (Siraaji) u tageen madaxweynaha oo ay ku cadaadiyeen inuu xilkan u xalaaleeyo una magacaabo maadaama uu isagu hayo, taasoo madaxweynuhu iska aqbalay isagoo aan dib u eegin qaabka awood qeybsiga dalka.
[ad name=”HTML”]
[spacer color=”8BC234″ icon=”Select a Icon” style=”1″]
HOOS KA AKHRI WAREEGTADA MADAXWEYNAHA
Madaxweynaha Jamhuuriyadda Federaalka ah ee Soomaaliya Mudane Xasan Sheekh Maxamuud ayaa maanta digreeto ka soo baxday xafiiskiisa lagu magacaabay Xisaabiyaha guud ee Qaranka.
Madaxweynaha Jamhuuriyadda Federaalka ah ee Soomaaliya, marii uu arkay Qodobka 87aad, farqadda 1aad Xaraf “C” iyo farqadda 2aad ee Dastuurka Jamhuuriyadda Soomaaliya.
Markuu arkay Qodobka 90aad, Xarafka “K” ee Dastuurka Jamhuuriyadda Soomaaliya
Markuu Ogaaday: Baahida loo qabo dhameystirka dhisidda Hey’adaha Dowladda.
Markuu tixgeliyay: Aqoonta iyo waayo-aragnimada uu mudanaha xilkan loo magacaabay u leeyahay, Xisaabaadka Hey’adaha Dowladda oo uu muddo dheer ka soo shaqeynayay
Waxa uu soo saaray Madaxweynuhu xeerkan
Qodobka 1aad
Laga bilaabo marka uu Madaxweynuhu saxiixo Xeerkan, waxaa Axmed Yuusuf Muumin (Siraaji) loo magacaabay in uu noqdo Xisaabiyaha guud ee Qaran
Qodobka 2aad
Xisaabiyaha guud ee dowladda waxa uu mas’uul ka yahay si madaxbanaan Xisaabaadka hey’adaha dowladda iyo in uu la socdo qarashka Dowladda ay bixiso iyo ilaalinta wixii ah maal lacageed oo ah keydka Dowladda.
Qodobka 3aad
Wixii howlo, xuquuq iyo maamuus ah waxaa lagu dhaqayaa Xeerka Lr.11 ee 05/12/2006 ee shaqaalaha rayidka
Qodobka 4aad
Waxa uu xeerkan dhaqan gelayaa markii uu Madaxweynuhu saxiixo, waxaana lagu soo daabacayaa Faafinta Rasmiga ah ee Jamhuuriyadda Federaalka ah ee Soomaaliyeed.
Digreetadan ayaa waxaa ku saxiixnaa Madaxweynaha Jamhuuriyadda Federaalka ah ee Soomaaliya Mudane Xasan Sheekh Maxamuud.
Wadani.com
[ad name=”HTML-1″]
