Madaxda Dowladda Soomaaliya iyo Dowlad Goboleedyada ayaa xalay saqdii dhexe kadib soo saaray habraacyo iyo faahfaahin ku saabsan Doorashada 2020/2021, iyadoo la saleeyay kuraasta xildhibaannada iyo magaalooyinka lagu dooranayo, lana soo saaray habraaca doorashada iyo dhismaha Guddiga xalinta khilaafka Doorashada.
Arrinta ugu weyn ee la hadalhayo ayaa ah in Doorashada 2020/2021 ay noqotay tii ugu xumeyd ee musharixiinta lag xiro lacagihii ugu badnaa, siiba musharaxa u taagan kursiga Golaha Shacabka oo lagu soo rogay lacag dhan $20,000, halka musharaxa Aqalka sare laga rabo $10,000.
Shuruudaha Xubinnimada Guddiga Maamulka Doorashada ee Heer Dowladaha Xubnaha ka ah ee 2020/2021
1. Waa inuu yahay muwaaddin Soomaaliyeed, Muslim ah, dhimirkiisu dhan yahay, da’adiisuna ka yareyn 30 sano xilliga la magacaabayo.
2. Waa in uu yahay qof dhexdhexaad ah, ku leeyahay sumcad wanaagsan bulshada dhexdeeda
3. Waa inuu yahay qof hufan, karti leh, una gudan kara waajibaadkiisa si daahfuran.
4. Waa in Maxakamadi aysan ku xukumin xarig ka dhashay fal danbiyeed ciqaab ah shanti sano ee ugu danbeysay.
5. Waa in uusan xil siyaasadeed ka hayn dalka
6. Waa in aqoontisu aysan ka hooseyn heerka kowaad ee Jaamacadda ama waayo aragnimo u dhiganta leeyahay.
7. Waa inuu fahmi karaa, nidaamka doorashooyinka dadban ee 2020/21.
Lifaaq 1. Shuruudaha ka mid noqoshada Ergada Dooranaysa Xildhibaanada Golaha Shacabka
1. In uu yahay Soomaali, kana tirsan yahay beesha kursiga ku heshay nidaamka awood-qaybsiga ee 4.5.
2. In da’adiisu uusan ka yareyn 18 sano
3. In miyirkiisu caafimaad qabo, uuna awood u leeyahay in uu codayn karo
4. In uu fahansan yahay mas’uuliyadda doorashada
5. In uusan musharax u ahayn Labada Aqal midkoodna
6. In aysan maxkamadi ku ridin xukun kama danbeys ah ee fal dembiyeed lagu muteysanayo xabsi shanti sano ee ugu dambeysay.
7. In uusan hayn xil siyaasadeed waqtiga doorashada
8. In uusan xiriir la lahayn kooxaha argagixisada
Lifaaqa 2. Shuruudaha Musharixiinta labada Aqal ee Baarlamaanka Federaalka.
Shuruudaha laga rabo musharaxiinta u tartamaya Labada Aqal ee Baarlamaanka Federaalka:
1. In uu yahay muwaadin Jamuuriyadda Federaalka Soomaaliyeed
2. Dhimirkiisu u dhan yahay
3. Da’diisu ka yarayn 25 sano
4. Aan xuquuuqdiisa muwaadinimo go’aan maxkamadeed lagu hakin shanti (5) sano ee ugu danbeysay.
5. Uu leeyahay ugu yaraan aqoon dugsi sare ama waayo aragnimo u dhiganta.
6. In uusan ka tirsanayn ama wax xiiriir ah la lahayn kooxaha argagixisada ah
7. In uu haysto waraaqda danbi la’aanta ee hay’adda danbi baarista (CID) ee dalka.
8. Musharax kasta oo u tartamaya Galaha Shacabka ama Aqalka Sare ee Baarlamaanka Federaalka Soomaaliya waa in uu bixiyaa lacagta diiwan-galinta kuna shubaa xisaabta bankiga ee Guddiga Doorashooyinka.
a. Lacagta diiwan-galinta Musharaxiinta u tartamaya Aqalka Sare waxay noqonaysaa $20,000 (labaatan kun oo dollar) musharax kasta.
b. Lacagta diiwan-galinta Musharaxiinta u tartamaya Aqalka Golaha Shacabka waxay noqonaysa $10,000, (Toban Kun oo dollar) musharax kasta.
c. Lacagta diiwan-galinta Musharaxiinta dib looma celinayo.
