Guddiga Doorashooyinka Hirshabeelle ayaa Maanta Magaalada Beledweyne ee Xarunta Gobolka Hiiraan ku qabtay kuraastii ugu horeysay ee Golaha Shacabka.
Lix kursi oo lagu doortay maanta Magaalada Beledweyne waxay natiijadii noqotay inay kusoo baxaan xubnihii loo sadaaliyey ee loo xiray tageerayaasha kooxda Farmaajo (Halkan ka akhriso)
Kursiga HOP086 ayaa waxaa kusoo baxay agaasimihii hor ee NISA Fahad Daahir Axmed oo magaca bedeshay, waxaana kursigan hore ugu fadhiyey Faarax Sheekh Cabduqaadir. Fahad ayaa helay codad dhan 70, halka musharaxii la tartamayey Axmed Dayib Axmed uu ka helay 24 cod.
Doorashada kursiga HOP086 ee uu kusoo baxay Fahad ayaan aqoonsi ka helin Guddiga Doorashada FEIT ee Federaalka oo hakiyey Kursigan.
Kursiga HOP015 ayaa waxaa markale kusoo baxay Wasiir kuxigeenka Wasaaradda Haweenka Xiis Xasan Aadan oo kursigaan hore ugu fadhiday, waxaana tartanka isaga hartay Maryan Xasan Cabdi oo la tartami laheyd, iyadoo cod gacantaag ah lagu siiyey 92 Cod, waxaana diiday 5 Cod.
Kursiga HOP008 Waxaa kusoo baxay Maxamed Barre Fiyoore, waxaana laga xiray oo hore ugu fadhiyey Dr. Xuseen Cabdi Cilmi, markii uu tartanka ka haray Ibraahim Axmed Inji, waxaana cod gacan taag 89 Cod lagu siiyey Maxamed Fiyoore.
Kursiga HOP274 ayaa waxaa markale kusoo baxay Maxamed Cabdullahi Xasan Nuux, waxaana tartanka isaga hartay Fardowso Xasan Ismaaciil, iyadoo lagu ayiday cod gacan taag ah oo dhan 78 Cod. 7 Ergo ay diiday.
Kursiga HOP109 ayaa waxaa markale kusoo baxay Cabdifitaax Qaasim Maxamuud oo ah Wasiir ku-xigeenka Gaashaandhigga, markii ay u tartanka ka hartay Xamdi Maxamed Muuse, waxaa cod gacantaag ku ayiday 92 cod.
Kursiga HOP074 waxaa kusoo baxay Cabdikariim Cumar Xuseen, waxaama hore ugu fadhiyay Wasiir kuxigeenkii hore ee Gaashaandhigga Cabdullaahi Colaad Rooble oo kursiga laga xirtay, waxaa cod gacantaag ah 98 cod kusoo baxay Cabdikariim Cumar Xuseen, markii uu tartanka ka haray Cabdishakuur Cabdullaahi Axmed.
