Munaasabad loogu dabaal degay 56 guuradii ka soo wareegtay dhismaha Ciidamada Xoogga Dalka Soomaaliyeed ee 12-ka April ayaa maanta ka dhacday xarunta Wasaaradda Gaashaandhigga ee magaalada Muqdisho, iyadoo ay si wadajir ah uga qeyb galeen madaxda dowladda Federaalka Soomaaliya iyo madaxda dowlad goboleedyada Puntland, Galmudug, Jubbaland iyo Koonfur Galbeed.
Madaxweyne Xasan Sheekh Maxamuud ayaa ugu horeyn markii uu tegay xarunta Wasaaradda difaaca waxa uu salaam sharaf ka qaatay cutubyo ka tirsan ciidanka xoogga dalka. Qeybaha kala duwan ee ciidamada xoogga dalka ayaa goobta ku soo bandhigay gaaddo ka cayaar iyo dhoolatus ciidan oo ku aadan munaasadda 12-ka April, waxaana ay ciidamada wateen gaadiid dagaal.
Taliyaha ciidanka xoogga dalka Sareeye Gaas Maxamed Aadan Axmed ayaa Madaxweynaha iyo mas’uuliyiintii la socotay warbixin ka siiyay howlaha ciidanka xoogga dalka iyo guulaha ay soo hooyeen.
Wasiirka Gaashaandhigga ee Xukuumadda Soomaaliya Jeneraal Cabdiqaadir Sheekh Cali Diini ayaa hambalyo kadib waxa uu ka warbixiyay marxaladihii kala duwan ee ay soo mareen ciiidanka xoogga dalka, isagoo xusay inay joogteynayaan dib u dhiska ciidanka.
Madaxweynaha Dowladda Federaalka ah ee Soomaaliya Xasan Sheekh Maxamuud ayaa ugu horeyn hambalyo ku aadan muaasabadda 12-ka April u diray ciidanka xoogga dalka iyo xaasaskooda. Wuxuuna ka dalbaday Waalidiinta carruurtooda ay soo qaldeen Al-shabab, isla markaana lagu qabtay dagaalladii ka dhacay Puntland iyo Galmudug inay soo raadsadaan carruurtooda, ayna ka hortagaan in carruurtooda la qaldo oo loo adeegsado colaadaha.
Madaxweynaha ayaa shahaado sharaf guddoonsiiyay diblomaasiin ka socday dowladaha Soomaaliya ka caawiyay dib u dhiska ciidanka.
DAAWO SAWIRRO
Wadani.com
