Madaxtooyada Soomaaliya ayaa faafisay War-Murtiyeed kasoo baxay kulankii koowaad ee shirka Jabuuti oo lagu kulansiiyey Madaxda dowladda Soomaaliya iyo Somaliland.
Arrintan ayaa ka danbeysay markii hore dowladda Jabuuti iyo IGAD ay faafiyeen War-murtiyeed hore oo ay ka dhex muuqatay inay wadahadleen laba dal, kaasoo ay si cad uga hor timid dowladda Federaalka, waxaana war-murtiyeedkaasi qaatay oo faafiyay Madaxtooyada Somaliland, halka midka dib loo saxay ay qaadatay Madaxtooyada Soomaaliya.
HOOS KA AKHRISOWAR-MURTIYEEDKA WADAHADALLADA DFS IYO SOMALILAND EE CUSUB
Iyada oo ku timid dadaal uu garwadeen ka yahay Madaxweynaha Jamhuuriyadda aan walaalaha nahay ee Jabuuti, iyo hoggaamiyayaasha gobolka ee ay ka mid yihiin:
Mudane Abiye Axmed Cali, Ra’iisul Wasaaraha ItoobiyaMudane Maxamed Cabdullaahi Maxamed Farmaajo, Madaxweynaha Jamhuuriyadda Federaalka SoomaaliyaMudane Muuse Biixi Cabdi, Madaxweynaha SomalilandWaxaa kulan wadatashi ah lagu qabtay caasimadda Jabuuti bishan 14ka Juun 2020 si gacan looga geysto sidii hoggamiyeyaasha DFS iyo Somaliland ay dib ugu sii ambaqaadi lahaayeen wadahadalladii iyo xiriirka ka dhaxeeya Dowladda Federaalka Soomaaliya iyo Somaliland.
Hoggaamiyeyaasha ayaa garawsan muhiimadda doorkii Jabuuti ay ku leedahay dadaallada nabad dhisidda iyo nabad ku soo dabaalidda gobolka.
Ka hor inta aan la iskugu imaan kulankan taariikhiga ah, waxaa hore u soo qabsoomay dhowr wadaxaajood oo natiijooyin badani aanay ka soo bixin.
Madaxweynaha Dowladda Federaalka Soomaaliya iyo Madaxweynaha Somaliland waxay isla garteen in guddi farsamo oo ka kooban labada wafdi ay sii ambaqaadaan wadahadallada u dhexeeya labada dhinac, isla markaasna ay ka sii shaqeeyaan arrimaha wali dhiman ee la isla qaatay.
Kulanka ayaa sidoo kale soo jeediyay in Jabuuti ay noqoto madasha shirarka farsamo ee labada dhinac.Waxaa lagama maarmaan ah in danta labada bulsho ay udub dhexaad u noqoto hanaankan wadahadal.
Kulankani wuxuu ku boorrinayaa dhammaan gobolka, qaaradda iyo hey’addaha caalamiga ah inay taageeradooda u muujiyaan hannaankan.
Kulanka ayaa ku qabsoomay Jabuuti14 June, 2020
