Afhayeen Madaxtooyada Soomaaliya Daa’uud Aweys Jaamac ayaa shaaciyay war kasoo baxay Madasha Qaran oo ku saabsan xiisada colaadeed ee ka jirta Magaalada Gaalkacyo.
Laba ka mida madaxda madasha oo kala ah madaxweynayaasha Puntland iyo Galmudug ayay ka dhaxeysaa colaadda Gaalkacyo, lama oga in Warkani ay qeyb ka yihiin iyo in kale.
HOOS KA AKHRISO WARKA
Madasha Hoggaanka Qaranka ayaa ugu baaqday dowlad goboleedyada Puntland iyo Galmudug inay deg-deg uga wada shaqeeyaan sidii loo xalin lahaa dagaalada soo noqnoqday ee ka dhacaya magaalada Gaalkacyo.
Xiriir khadka telefonka ay ku yeesheen dhammaan madaxda Madasha Hoggaanka Qaranka ayaa waxay ku muujiyeen walaacooda ku saabsan qatarta ka imaan karta colaadda ka taagan Gaalkacyo oo ay ku tilmaameen mid ka hor imaaneysa dadaalka dib u heshiisiinta iyo guud ahaan geeddi socodka doorashooyinka 2016.
“Ma aqbali karno in si micno darro ah loo daadiyo dhiigga shacabka, waxaana colaadda ka socota Gaalkacyo ay wax u dhimeysa mas’uuliyadda aan qaranka u hayno oo ah inaan ka shaqeyno horumarkooda iyo bedqabkooda. Sidaa darteed waa in deg-deg maamullada ay colaaddan khuseyso ay la yimaadaan xal lagu soo afjarayo dagaalka socda’’, ayay si wadajir ah u yiraahdeen madaxda Madasha.
Madasha ayaa sidoo kale xustay in shirka uga furmaya magaalada Muqdisho maalinta Talaadada oo ku beegan 10-ka October, ajandaha ay ka hadli doonaan uu ka mid noqon doono dagaalka Gaalkacyo.
Madasha Hoggaanka Qaranka ayaa tacsi u diraysa qoysaskii iyo eheladii dadkii ku geeriyooday iyo kuwii ku waxyeeloobay dagaalka Gaalkacyo, iyadoo sidoo kalena ubu baaqdey madaxda maamullada Galmudug iyo Puntland inay qaadaan tallaabooyin lagu joojinayo colaadda, kana waantoobaan falalka iyo hadalada xanafta leh ee keeni kara in colaadda halkaa ka taagan ay sii fogaato.
——————-DHAMMAAD——————-
Daud Aweis
Afhayeenka Madaxtooyada
Jamhuuriyadda Federaalka Soomaaliya
Email: [email protected]
www.villasomalia.gov.so
