Madaxweynaha Somaliland Muuse Biixi Cabdi iyo wafdi uu hoggaaminayo ayaa maanta u dhoofay dalka Imaaraadka Carabta, iyadoo la sheegay inuu socdaalkiisa qaadan doono muddo kooban.
Waxaa la sheegay inuu Muuse Biixi martiqaad rasmi ah ka helay masuuliyiinta dalka Imaaraadka carabta oo diyaarad gaar u diray, taasoo saaka qaaday Garoonka magaalada Hargeysa, waxaana socdaalkii labaad ee Muuse Biixi ku tegayo Imaaraadka muddo 40 maalmood gudahood ah, waana socdaalkii saddexaad intii uu xilka qabtay.
Bartamihii bishii Maarso ayey ahayd markii Muuse Bixii uu socdaal si la yaab leh loogu soo dhoweeyay ku tagay dalka Imaaraadka, wuxuuna markaasi la kulmay madax ka tirsan xukuumadda Imaaraadka.
Waxaa Muuse Biixi Cabdi ku wehliya socdaalkiisa Imaaraadka Carabta wasiirrada wasaaradaha Arrimaha dibadda Yaasiin Xaaji Maxamuud Xiir iyo Qorshaynta iyo Horumarinta Cabdiraxiim Cismaan Xaaji Cabdi.
Waxaa isna muddo laba toddobaad ku dhow ku sugnaa dalka Imaaraadka Madaxweynaha Puntland Siciid C/llaahi Deni.
