Qaar ka mida dadkii ku dhaawacmay Qaraxii weynaa ee shalay ka dhacay Ex.Kontrol Afgooye iyo meydadka laba qof oo Turki ah ayaa gooe dhoweyd loo duuliyey dalka Turkiga.
Tirada dhaawacyada la qaaday ayaa gaaraya 15 qof oo laga soo qaaday Isbitaalka Erdogan (Ex. Digfeer) ee magaalada Muqdisho, waxaana la sheegay in xaaladooda aan wax looga qaban karin magaalada Muqdisho isbitaallada ku yaalla.
Waxaa kaloo dalka Turkiga loo qaaday laba muwaadin oo Turki ah, kuwaasoo shalay ku dhintay qaraxii Ex. Kontrol Afgooye, iyadoo ka mid ahaa shaqaalaha shirkadda Turkiga ee dhiseysa Wadadda isku xirta Muqdisho iyo Afgooye.
Madaxweynaha Soomaaliya Maxamed Cabdulalahi Farmaajo ayaa tegay Garoonka Diyaaradaha Adan-Cadde ee Magaalada Muqdisho, isagoo ka qeyb galay sagootinta meydadka Turkiga ee dalkooda lagu celinayo iyo Dhaawacyada loo qaadayo dalkaasi.
Ciidamada Madaxtooyada ayaa saxafiyiinta ka hor istaagay inay muuqaallo ka qaadaan madaxweyne Farmaajo inta uu ka qeybgalayey sagootinta meydadka labada qof ee Turkiga ah, kuna sugnaa garoonka; iyadoo duco kooban loogu sameeyay diyaaradda markii la saaray.
Dowladda Turkiga ayaa ahayd dowladii ugu horeysay ee soo dirta gurmad caafimaad iyo dhaqaatiir, iyadoo dhaawacyada darran siineysa gargaar caafimaad oo lagu daweynayo dalkeeda.
