Madaxweynaha Puntland siciid C/llaahi Deni ayaa si kulul u weerarray natiijada Imtixaanka Dowladda e Dugsiyada Sare ee Bartamaha iyo Koonfurta Soomaaliya, isagoo weerar ku qaaday Wasiirka Waxbarashada ee xilka sii-haya C/llaahi Goodax Barre.
Siciid Deni oo khudbadiisa Billaha ah ee xaaladda Puntland xalay ka jeediyey magaalada Muqdisho oo uu ku sugan yahay ayaa difaacay inay Puntland iska diiday ka mid noqoshada imtixaanka guud ee dowladda Soomaaliya marka loo eego sida wixii kasoo baxay natiijadii Imtixaankii dowlada ee 2020-ka.
“Wasiirka Waxbarashada (C/llaahi Goodax) mar uu Puntland eedeynayay wuxuu yiri: Imtixaan aan ka warqabin shahaado suur kama noqon karno, hadda waxaan hubaa wax badan inuu ka warqabin natiijada imtixaanada gobollada ka soo baxay oo natiijadeeda aanay sax aheyn” ayuu ku dooday Madaxweyne Deni oo Muqdisho ku tilmaamay magaalo ay taallo aqoon badan oo kaalimaha hore geli jirtay.
isagoo difaacaya diidmadii Puntland ee imtixaanka Dowladda ayuu Deni yiri: “Runtii natiijada la shaaciyey waxay muujineysaa wixii aan ka digeyney iyo fashilka ay leedahay in la yiraahdo imtixaan guud ayaan qaadeynaa iyada oo aan dalkaba war loo hayn.. Magaalada Muqdisho waxay ahayd magaalooyinka ugu tayada fiican dhanka waxbaarashada, ugu macalimiinta fiican, in ardey intaas le’eg ay ku dhacaan waa wax aan la aqbali karin, xaa.ladda adduunka oo dhan ayaa isbedeshey COVID-19 kadib, iskooladii ayaa la xirey, dalal badan ayaa qiimeyn ardeydoodu ku baasiyey….” .
Wasiirka Waxbarashada Xukuumadda Soomaaliya iyo maamulka Puntland ayaa muddo dheer isku heysta arrimaha waxbarashada, iyadoo khilaafkoodu gaaray meeshii ugu sareysay markii Wasiir Goodax ku adkeystay inuusan shahaado siineyn arday aan gelin imtixaanka dowladda.
