Xaflad caleemo saar ah oo si heer sare ah loo soo agaasimay oo lagu duubay Malaaqa cusub ee beeshaa Xamar iyo Xamar-daye ayaa maanta lagu qabtay deegaanka Ceel Cadde ee duleedka Muqdisho. Malaaq Cali Maxamed Wehliye ayaa xalfada lagu caano shubay, waxaa ka qeybgalay mas’uuliyiin ka tirsan dowladda Federaalka Soomaaliya oo isugu jiray wasiirro wasiir ku xigeenno, madaxda gobolka Banaadir iyo mudanayaal ka tirsan baarlamanka.
Sidoo kale Xafladda waxaa goob joog ka ahaa R/wasaarihii hore ee Soomaaliya Nuur Xasan Xuseen “Nuur-cadde”, siyaasiyiin uu ka mid ahaa C/kariin Xuseen Guuleed, Gudoomiyaha gobolka Banaadir ahna duqa magaalada Muqdisho Xasan Maxamed Xuseen “Muungaab” gudoomiyaha gobolka Sh/Dhexe, Cali Guudlaawe, guddoomiyaha gobolka Sh/hoose Maxamed Nuur Siidi, Imaan Maxamed Yuusuf, duubab iyo marti sharaf kale oo fara badan.
Imaan Maxamed Yuusuf oo ka hadlay munaasabadda ayaa si weyn usoo dhaweeyay caleema saarka Malaaq Cali Maxamed Wehliye, isagoo u rejeeyay inuu noqdo kii nabad iyo baraare u horseeda bulshada Soomaaliyeed. Ra’iisal wasaarihii hore ee Soomaaliya Nuur Xasan Xuseen (Nuur cadde) ayaa ugu hambalyeeyay Malaaqa xilka dhaqanka ee loo caleema saarayo, wuxuuna kula dardaarmay in uu si hufan u guto howlaha loo igmaday.
Gudoomiyaha gobolka Banaadir Xasan Maxamed Xuseen “Muungaab” oo isna ka hadlay xaflada Caleemasaarka ayaa soo dhoweeyay caleemasaarka Malaaqa isagoo ugu hambalyeeyay Malaaq Cali Maxamed Wehliye in uu noqdo Malaaqa 11-aad ee beelaha Xamar iyo Xamar-daye wuxuuna ballan qaaday in uu si wanaagsan ula shaqeyn doona malaaqa.
Imaam Maxamed Yuusuf oo ku hadlay magaca duubabka dhaqanka Soomaaliyeed ayaa malaaqa u hambalyeeyay isagoo tilmaamay in xil culus loo dhiibat, sidaasi darteedna loo baahanyahay in uu si daacadnimo leh ugu shaqeeyo xilka loo doortay.
“Malaaq Cali Maxamed Weheliye waan la shaqeyndoonaa hadaan nahay duubabka Soomaaliyeed, waxaana u rajeeyhaa in uu Alle la garab galo xilka culus ee loo caleema saaray” ayuu yiri Imaam Maxamed Yuusuf.
Malaaq Cali Maxamed Wehliye ayaa noqonaya Malaaqa 11-aad oo ay yeeshaan beelaha dega Xamar Xamar Daye, iyadoo xafladda caleemaarka maanta ka dhacday deegaanka Ceelcadde ay ku dhacday jawi aad u wanaagsan oo heer sare ah.
[ad name=”HTML”]
[ad name=”HTML-1″]
[ad name=”HTML-6″]
