Maxkamad ku taalla dalka Holland ayaa mar kale muddo u qabatay Dacwad dhex taalla Guddoomiyaha G/Banaadir C/raxmaan Cumar Cismaan (Yariisow) iyo Daahir Cabdulle Calasow oo ah weriye degan dalkaasi.
Dacwadan oo muddo socotay ayaa Maxkamadda Sare ee dalka Holland ay u muddeeyay inay dhacdo 21-ka bisha soo socota ee September, waxaana mar kale la dhageysan doonaa kiis uu weriyaha Daahir Calasow ku soo oogay duqa Muqdisho.
C/raxmaan Yariisow ayaa dhowr jeer si qarsoodi ah ku tegay dalka Holland si dacwadda ka dhanka ah uu u xaadiro, waxaana markan ay tahay mid u furan dadweynaha oo ay ka qeybgeli karaan, iyadoo qareeno labada dhinac u doodayaan.
Daahir Calasow oo ah Soomaali deggan dalka Holland iyo shakhsi hoggaamiya muranka iyo doodaha baraha bulshada (controversial person) ayaa dacwad uu hore ugu soo oogay Cabdiraxmaan Cumar Cismaan (Inj. Yariisow) xilli uu ahaa wasiirka warfaafinta Soomaaliya, taasoo salka ku heysay Wasiir Yasiirow markii ay socotay kiiskii dacwadii u dhaxeysay Dahabshiil iyo Daahir Caslasow uu Inj. Yariisow qoray qoraal Dahabshiil ku darsatey dacwadeeda oo la xiriiray inuu Daahir Calasow yahay qof dadka handada oo khasba iskuna daya in sidaas lacag uga qaado, qoraalkaas ayuuna kiiska dacwadda u furtey xilligaas.
Waxaa kiiskaas hor ay Maxkamad ku taala magaalada Amestardam ee dalka Holland ka xukmisay Daahir Calasow, iyadoo ku xukuntey in uu bixiyo kharashkii dacwadda uga baxay Yariisow.
Mar uu kiiskaasi ka hadlay Daahir Calasow ayuu sheegay in dacwadda uu uga dan lahaa inuu dadka tusiyo inaysan jirin cid sharciga ka sareysa oo mas’uul kasta laga dacweyn karo maxkamadaha dalalka Yurub.
