Ra’iisal wasaaraha Xukuumadda Soomaaliya Xasan Cali Kheyre oo kulan degdeg isugu yeeray saraakiisha amniga amarro cusub ku soo rogay dardar gelinta amniga Muqdisho.
Ra’iisal wasaare ayaa la sheegay in taliyeyaasha Hay’adaha Amniga uu kala hadlay dardargelinta amniga, iyo sidii looga hortegi lahaa falalka kooxda Alshabaab ee qaraxyada iyo weerarrada, waxaana kulankani ka dambeeyay weerarkii shalay lagu qaaday xarunta Degmada Wadjair.
Arrimaha Ra’iisal wasaare faray saraakiisha Amniga waxaa ka mida: Inaan loo dulqaadan karin weerarro lagu laayo dad Soomaaliyeed, loogana baahan yahay hay’adaha ammaanka inay ka hortagaan qaraxyada iyo in wadooyinka la xiray dib loo furo maadaama ay dhibaato ku sii kordhinayaan shacabka.
Warbixinta weerarkii Degmada Wadajir ayaa keentay in Hay’adaha ammaanka lagu cannaanto dayaca ka muuqda iyo inaysan gaarsiisney heerkii looga baahaa feejignaanta iyo ka hortagga caddowga.
Kulanka ku sugnaa Wasiirka Amniga gudaha Maxamed Abuukar Islow (Ducaale), waxaana ka qeyb galay dhammaan taliyeyaasha ciidmada.
