Madaxweynihii hore Shariif Sheekh Axmed oo hadda ah hoggaamiyaha xisbiga KMG ah ee Himilo Qaran ayaa sheegay inuu dacwad ka dhan ah xukuumada Somalia u gudbiyey Maxkamadda Sare ee dalka.
“Iyada oo laga duulayo dhowrista iyo ilaalinta shuruucda dalka ayaan si rasmi ah dacwad ugu gudbinnay maxkamadda sare ee dalka taasi oo ku saabsan is hortaaggii sharci darrada ahaa ee xukuumaddu ay ku sameysey xubnihii xisbiga Himilo Qaran ee aan hogaaminayay kuna socdey Kismaayo xarunta KMG ee Jubaland…” ayuu yiri Shariif Sheekh Axmed oo qoraal kasoo saaray dacwadda ay maanta shaaciyeen xubno ka mida xisbigiisa.
Sheekh Shariif ayaa sheegay inaysan jirin Cid ka sareysa sharciga, sidaa darteedna ay maxkamadda sare ee dalka ka doonaynaa cadaalad, ayna Dacwadooda si gaar ah uga wajahan tahay laanta fulinta ee dowladda oo bixisay amarkii sharci darrada ahaa.
Saacado ka hor ayey ahayd markii ay shir jaraa’id qabteen xubno ka tirsan Xisbiga Himilo Qaran, iyadoo uu saxaafada qoraalka dacwadda u akhriyey xoghayaha arrimaha dibadda ee xisbiga Himilo Qaran Senator Ilyaas Cali Xasan.
