Madaxweynihii hore ee Dowladii KMG ahayd ee Soomaaliya Shariif Sheekh Axmed ayaa cudurdaar iyo raaligelin ka bixiyey war kasoo yeeray maanta oo ku saabsanaa maamulka Koonfur Galbeed ee Soomaaliya.
Sheekh Shariif ayaa maamulka K/Galbeed ku tilmaamay Bay iyo Bakool, taasoo keentay inay ka caroodaan siyaasiyiinta iyo maamulka K/Galbeed, kadibna waxaa raaligelin bixiyey Sheekh Shariif oo sheegay in hadalkiisa si khaldan loo fahmay oo aanu ula jeedin, balse si khaldan uga soo baxay.
“Waxaan rabaa inaan ka cudurdaarto hadal maanta aan si u iri, si kalena laga yaabo in loo qaatay oo ahayd markii aan magacyada maamul goboleedyada tirinayay oo dowlad goboleedka Koonfur Galbeed aan iri Bay iyo Bakool. Ujeedkeygu wuxuu ahaa Koonfur Galbeed Mahadsanidiin..” ayuu yiri Sheekh Shariif.
Sheekh Shariif ayaa maanta shir jaraa’id oo waqti dheer qaatay ku qabtay magaalada Muqdisho, wuxuuna uga hadlay xayiraad looga hor istaagay inuu u dhoofo magaalada Kismaayo, isagoo ka qeyb geli lahaa caleemo saarka Axmed Madoobe oo muran ka dhashay doorashadiisa.
