Dowladda Soomaaliya oo ka mida dalalka Afrika ee Dunida uu hooseeya arrimaha Caafimaadka ayaa qeylo-dhaan u dirsatay dalal yo Hay’ado kala duwan si looga saacido dagaalka ay kula jirto cudurka Coronavirus oo ku faafaya gudaha dadweynaha.
Waxaa ilaa iminka kaalmo caafimaad soo gaarsiiyey dowladda Soomaaliya Ganacsadaha Shiinaha u dhashay ee Jack Ma oo dalalka Afrika oo dhan u diray Qalab caafimaad iyo Dowladda Talyaaniga oo sheybaar lagu baaro cudurka u soo iibisay Wasaaradda Caafimaadka Soomaaliya.
Dhinaca kale Dowladda Imaaraadka ayaa qalab caafimaad oo lagu tacaalo Cudurka Coronavirus ka dejisay magaalooyinka Hargeysa iyo Boosaaso oo xiriir dhow ay la leedahay, laakiin waxaa la xaqiijiyey in dowladda Soomaaliya oo codsi taageero u dirsatay dalalka Qatar iyo Turkiga aysan weli jawaab ka helin, balse la sugayo.
Dalalka Turkiga iyo Qatar ayaa taageero Qalab caafimaad ah u diray boqolaal dal oo ay ka mid yihiin, Ingiriiska, Spain, Italy iyo qaar kale oo fara badan, lamana oga sababta keenay inay dib u dhacdo taageeradii laga filayey inay dowladda Soomaaliya siiyaan.
Mareykanka ayaa ku dhawaaqay in lacag dhan 7 Milyan oo Doolar ku taageerayo dagaalka Soomaaliya kula jirto cudurka Coronavirus, lacagtaas oo la filay in hay’ado lasoo marsiiyo, halka Bankiga Adduunka laga sugayo taageero dhaqaale.
Baahida ugu weyn ee hadda taagan ayaa ah Qalabka Neefta ka saacida Bukaanada cudurka Coronavirus iyo sariiraha xaaladda degdega ah ku qalabeysan ee ICU-da, iyadoo isbitaalka kaliya ee dowladu sheegtay in loo diyaariyey la-tacaalidda cudurka ee Martiini aysan oolin Qalab caafimaad iyo shaqaale badan oo arrintan wax ka qaban kara.
Isbitaalka Digfeer ayaa saddex sariir iyo Qalab Oxgen ah gaarsiiyey Isbitaalka Martiini, kuwaasoo ah qeybtii ugu horeysay ee gaara isbitaalkaasi oo hadda xaaladiisa laga deyrinayo. (Akhriso)
Wasaaradda Caafimaadka xukuumadda Soomaaliya oo dhex fadhida fadeexad Musuq, ayna xiran yihiin agaasimeyaal ka tirsan ayaa xaaladda uga sii dartay iyadoo aanay muuqan abaabul weyn oo halisa cudurkan looga hortegayo xilli ay u dhimanayaan dad Soomaaliyeed.
