Wararka laga helayo magaalada Dhuusamareeb ee xarunta Galmudug ayaa sheegaya in shirkii dib u heshiisiinta Beelaha Galmudug ee lagu waday inuu Berri furmo uu dib u dhac ku yimid arrimo aan la shaacin dartood.
Shirkan oo markii labaad dib u dhacay ayaa wararku sheegayaan inaan muddo kale loo qaban xilliga uu furmi doono, iyadoo Guddoomiyaha Guddiga Dib u heshisiinta Galmudug C/raxmaan Baadiyow looga yeeray magaalada Muqdisho, si uu wadatashi ula yeesho madaxda dowladda Federaalka.
Dhinaca kale ergooyinka ka qeyb galaya shirka ayaa kuwoodii ugu horeeyay gaaray magaalada Dhuusamareeb, iyadoo qabanqaabada shirka la dhameystiray, laakiin markii labaad uu dib u dhac ku yimid shirka oo markii hore loo qabtay inuu furmo 5-ta iyo 17-ka Ogost 2019.
