Shirka wadatashiga hiigsiga cusub ee Soomaaliya ayaa Axadda ka furmaya magaalada Muqdisho iyadoo warar kala duwan hore uga soo baxeen halka lagu qabanayo shirka iyo sida looga qeyb galayo.
Madaxweyne Xasan Sheekh ayaa ku adkeystay in shirku ka dhacayo magaalada Muqdisho, kadib go’aankii lagu qaatay magaalada Kismaayo Maalintii Axadii 13-kii bishan markii uu qabsoomi waayay shir lagu waday inuu magaaladaasi ku dhex maro madaxda dowladda Federaalka iyo madaxda maamulada dalka ka jira.
Qorshe kale oo maalin kadib ay ku heshiiyeen Ra’iisal wasaare Cumar C/rashiid, Madaxweynaha Puntland C/weli Gaas iyo madaxweynaha Jubba Axmed Madoobe ayaa la go’aamiyay in shirkani ka dhaco isla Kismaayo, sida uu shaaaiyay madaxweyne ku xigeenkii hore ee Jubba C/qaadir Luga-dheere.
Arrintan uu Muqdisho kula soo laabtay Ra’iisal wasaaraha ayaa si weyn uga hor yimid Madaxweynaha oo ku adkeystay in shirku ka dhacay Muqdisho sidii lagu shaaciyay shirkii loo dhamaa ee Kismaayo.
Dowladda Federaalka, Maamulada Koonfur Galbeed iyo Galmudug ayaa la xaqiijiyay inay ka qeyb galayaan shirka. Xogtii ugu danbeysay ee Wadani.com ayaa sheegaysa in cadaadis weyn lagu hayo madaxweynayaasha Jubaland iyo Puntland Axmed Maxamed Islaam (Axmed Madoobe) oo isagu sheegay inuu wafdi soo dirayo iyo C/weli Maxamed Cali (Gaas) oo gebi ahaan qaadacay shirka.
Wakiilada Beesha caalamka oo uu ugu horeeyo Ergeyga Q/Midoobay ayaa labada nin ku tirtirsiiyay inay yimaadaan shirka Muqdisho oo ay mowqifyadooda ku daraan haddii kale ay dhici doonto in go’aanka ka soo baxa Q/Midoobay uu saameyn doono. Waxaa muuqata inay markan ku adkaan doonto inay qaadacaan shirka Muqdisho.
Wadani.com
[ad name=”HTML-1″]
