Xubnaha labada Gole ee Dowlad Goboleedka Jubbaland, kana soo jeda Gobolka Gedo gaar ahaan, Beesha Sade ayaa soo saaray go’aan ay ku taluiyeen in laga fiirsado doorasho ka dhacda magaalada Garbahaarey ee Gobolka Gedo oo ay taallo 16 kursi.
Mas’uuliyiinta ka mida xukuumadda iyo Baarlamaanka Jubbaland ayaa u soo jeediyay Madaxweynaha Jubbaland Axmed Madoobe inuu dib uga fekero xal kale oo suuragelin kara Qabsoomida doorashada 16 kursi ee yaala Garbahaarey oo ay ku jirto in laga wareejiyo magaaladaasi oo ay maamusho Hay’adda NISA.
Qoraalka ay soo saareen ayay arrintan sabab uga dhigeen 7 arrimood oo ka taagan magaalada Garbahaarey, kuwaas oo kala ah:
1. Garbahaarey waa Deegaan Doorashada kaliya oo aan laheyn Maamul ku dhisan Dastuurka iyo xeerarka kale ee Dalka u degsan.
2. Garbaarey waa Deegaan Doorashada Kaliya ee ciidamada ku suggan Ammar lagu siiyey in Aay Ladagaalamaan Hay’adaha Dastuuriga ah ee Jubbaland, waxayna meesha kasaareen Maamulkii sharciga ahaa Ayakoo xirray masaafuriyeyna Guddoomiyaha Garbahareey oo illaa hadda banaan joog ah. Arrintaas oo caqabadd ku ah masuuliyiinta labada gole ee Dowladda Jubaland, xildhibaanada federaalka, siyaasiviinta iyo odavaasha dhaqanka rasmiga ah ee ka soo jeeda deegaan doorashada 2aa ee ka aragti duwan Villa Soomaaliya. Fulinta amarkaan Liddka ku ah Qarannimada Soomaaliya waxaa u xilsaaran horjoogayaasha Hay’adda NISA ee Ku kala sugan Gobalka Gedo iyo Muqdisho
3. Dhawaan ayay aheyd markii horjoogayaasha NISA ay ku soo daad gureeyeen goobta Deegaan Doorashada 2aad ciidamo lagu magacaabo duufaan halkaasoo ay fariisimo ka sameesteen garoonka diyaaradaha Magaalada Garbaharey, si aay u carqaladeeyaan habsami u socodka doorashada isla markaana is-hortaag ugu sameeyaan madaxda Dowladda Jubaland iyo musharaxiinta kale ee ka aragtida duwan.
4. Horjoogayaasha NISA ee Gobolka Gedo waxay marar badan shaaciyeen isla markaana ka digeen in Mas’uuliyiinta Jubaland aysan imaan Karin kana howl geli karin Goobta doorasho deegaanka 2aaad ee Garbahareey.
5. NISA waxay Deegaan Doorashada 2baad ka abuureen xaalad ku dhisan cabsi gelin, caga jugleyn, handadaad iyo hubanti la’aan iyaga oo si joogta ah u beegsanayo odayaasha dhaqanka, siyaasiyiinta, saxaafada iyo saraakiisha ciidanka Ka aragti duwan ee ku sugan goobta doorasho deegaanka 2ada ee Dowlada Jubaland
6. NISA waxay abuureen siina huriyeen xaaladd amni daro oo horseedi karta Gacan ka Hadal hubeysan oo dhexmara beelaha wadaaga kuraasta matalaada dhexdooda ka dib markii ay is abaabuleen isna hubeeyeen siddeed beelood oo ku sugan goobta deegaan doorashada labaad ee Garbahaarey.
7. NISA waxay bishii November, 2021 kii hor istaag ku sameeyeen wafdi uu hogaaminayo Madaxweyne Ku Xigeenka 1aad ee Jubaland oo Safar shaqo oo looga gol lahaa in maamul looga dhiso Magaalada Garbaharey si doorashada loogu qabto.
