War-saxaafadeed kasoo baxay Golaha Siyaasiyiinta Somaliland ee Beesha Dirta Waqooyi ayaa si cad loogu sheegay inuusan jirin wax heshiis ah oo laga gaaray arrinta Doorashada xildhibaannada kasoo jeeda Somaliland.
Siyaasiyiinta Waqooyi ee Garabka Guddoomiyaha Aqalka Sare Cabdi Xaashi C/llaahi ayaa qoraalkooda ku sheegay inay soo bandhigeen wax kasta oo ay xal u arkayeen, laakiin nasiibdarro Ra’iisal wasaaraha iyo golahihiisa Wasiirada aysan la imaan wax hindise iyo xal u noqon kara is mari waaga taagan.
“Waxaan madaxda dowlad Goboleedyada, waxgaradka Soomaaliyeed iyo Daneeyayaasha Doorashada 2021 la socodsiineynaa inay muuqato in Ra’iisal wasaaruhu ka baxay heshiiskii la gaaray iyo wadahalladii socday. Sidaas darteed ilaa inta xal kama danbeys ah laga gaarayo hannaanka hagidda xildhibaannada labada Gole, goobta doorashada, iyo guddoonka Guddiga Doorashada ee SL” ayaa lagu yiri qoraalka Golaha Siyaasyiinta Somaliland.
Garabka Cabdi Xaashi waxay qaadaceen doorashada Guddiga Somaliland ee SEIT iyo go’aannada kasoo baxay Ra’iisal wasaare Rooble. “Waxaan si cad u sheegeynaa inaanan qeyb ka noqon karin go’aan hal dhinac ah loogu daneynayo iyo doorashada Guddiga SEIT Somaliand ee ay maanta ku baaqeen Guddiga FEIT maalinta sabtida ee 7-da Bishan”
