Su’aalo badan ayaa ka dhashay qarixii xalay lagu weerarray Maqaayadda Luul Yemani ee magaalada Muqdisho, kadib markii uu ku soo beegmay xilli ay magaalada xireen ciidamo badan oo dowladda uu talogashay inay ku joojiso bannaanbixii Musharixiinta Mucaaradka.
Xildhibaanno ka tirsan mucaaradka ayaa is weydiiyay sida uu qaraxaasi ku dhacay iyadoo ciidamada Amniga dowladda ay xireen wadooyinka caasimadda, waxayna farta ku fiiqeen in dowladdu wax ka ogeyd qaraxaasi.
“Wixii maanta ciidan kala duwan oo banaanbaxa nabadeed looga hortagaayay xagguu qaraxu ka soo maray. Mase banaanbaxa ayaa bari lagu qarxin rabay si eedda Murashaxiinta loo saaro!” ayuu yiri xildhibaan C/raxmaan Odowaa oo ka mia xildhibaannada mucaaradka.
Xildhibaan Mahad Salaad ayaa isna farriintan qoray: “Ciidamada shacabka boorarka iyo calamada sita lagu baacsanayo, qaraxyada iyo weerarada Alshabaab ku gumaadayaan shacabka maa looga difaaco. Mise waa shaqo shirko lagu wada yahay?!”
Xildhibaan C/llaahi Maxamed Nuur isagu sheegay inay nasiib darro tahay in ciidamadii amniga shacabka sugi lahaa loo adeegsado laguna mashquuliyo carqaladaynta shacab diidan dictatorship dalbanayana Doorasho Dimoqoraadi ah una Banaanbaxaya si nabad ah, sidaasna dadkii loo dayaco waana danbi la’iskula xisaabtami doono.
“Ninkaan Mudda xileedkiisi dhammaaday ee xukun jaceelku waalay xataa uu kari waayay in uu u tacsiyeeyo 30-kii qof ee xalay Muqdisho lagu dilay, dhacdadaan iyo dhacdadi Xabsiga Boosaasaba waxay adkaynayaan xanti ahayd inay laba Shabaab wada shaqeeyaan!” ayuu qoraalkiisa ku yiri xildhibaan C/llaahi Maxamed Nuur oo mar kale sheegay inay jirto sabab loo rumeyso in Farmaajo ku lug leeyahay qaraxyada si dareenka dadka isaga jeediyo.
Qaraxa Muqdisho oo ay dad badan ku dhinteen waxaa ka gaabsaday inay ka haldaan madaxa sare ee dowlada Federaalka, halka uu Tacsi u diray Madaxweynaha Puntland iyo madaxweynayaashii hore ee dalka.
