Taliyaha Hay’adda nabadsugidda Soomaaliyee C/raxmaan Maxamed Tuuryare ayaa amar la yaab leh ku soo rogay Warbaahinta gudaha isagoo u sheegay in wixii maanta (3 May 2015) ka danbeeya aanay adeegsan karin magaca “Alshabaab” ee loogu yeero kooxda Shabaab Almujaahidiin, isagoo ku maray saxaafadda inay kooxdaasi ugu yeerto magaca ay iyagu u bixiyeen ee ah “UGUS” -Ururka Gumaadka umadda Soomaaliyeed.
Dhageyso codka Taliyaha
[ad name=”HTML-1″]
Hadalkan ayuu Taliye Tuuryare ka sheegay xaflad maanta ka dhaceysay Hotelka Jazeera ee magaalada Muqdisho oo lagu xusayay maalinta warbaahinta caalamka ee 3-da May, waxaana xuskaasi soo wada qabanqaabiyay Wasaaradda Warfaafinta dowladda Federaalka, ururka NUSOJ iyadoo uu ay maalgelisay hay’adda VIKIS ee qaabilsan horumarinta saxaafadda dalka Finland.
Arrintan ayaa dhibaato hor leh ku noqoneysa saxaafadda gudaha dalka ka shaqeysa iyadoo hore nabadsugidu ay amarro xarig ah la daba joogtay warbaahintii wareysata mas’uuliyiinta kooxda Alshabaab, sida ku dhacday Idaacadda Shabelle.
Muranka ku saabsan magac bixinta iyo waxa loogu yeerayo kooxda Alshabaab waxay soo taxneyd muddo ka badan 5 sano, iyadoo la xusuusto amarkii Alshabaab ku soo rogtay warbaahinta ee ahaa inay ugu yeeraan: “SHABBAAB ALMUJAAHIDIIN”.
Waxaa la yaab lahayd in xaflad loogu talogalay xoriyadda saxaafadda oo hay’ad reer Galbeed ah ay maalgelineyso looga dhawaaqo amarkan saxaafadda lagu xakameynayo, waxayna tani weji gabax ku tahay ururka NUSOJ iyo Wasaarada Warfaafinta dowladda Federaalka.
[ad name=”HTML”]
[ad name=”HTML-6″]
