Waxaa si toos ah magaalada Dhuusamareeb ka socota doorashada senatoorada Aqalka Sare ee Baarlamaanka Federaalka Soomaaliya, iyadoo maanta la dooranayo 6 kursi oo ay u tartamayaan 12 Musharax.
Kursiga 1-aad: Musharixiinta ugu horeyn ka hor hadlay Baarlamaanka Galmduug ayaa kala ahaa:
1- Siciid Siyaad Shirwac
2- Maxamed Daahir Maxamed
Waxaa mid waliba la siiyey muddo shan daqiiqo ah oo uu waxqabadkiisa kusoo bandhigo, waxaana ka muuqatay goobta buuq badan markii uu hadlayey musharax Maxamed Daahir oo loo arko nin aan saameyn lahayn.
Kursiga 2-aad:
Waxaa u sharxan oo ku tartamaya Musharixiinta kala ah:
1- Senotar Yuusuf Geelle Ugaas
2- iyo Daahir Faarax Fiidow
Yuusuf Geelle ayaa u sheegay Baarlamaanka Galmduug inuu ka mid yahay kooxda Waayo-arag ee madaxweynaha Galmudug ka mid yahay, isla markaana ay u baahan tahay Galmudug waayo-aragnimadiisa.
“Waxaan rabay sanadkan inaan aado Golaha Shacabka, laakiin Madaxweynaha Galmudug ayaa iga diiday oo ii sheegay inaan la iiga maarmin Aqalka Sare..” ayuu yiri Yuusuf Geelle Ugaas oo codsaday in codka la siiyo.
Musharax Daahir Faarax ayaa u sheegay Baarlamaanka Galmudug inuu yahay musharax sax ah oo ay dhageystaan, laguna buuqin sidii musharixii hore.
Kursiga 3-aad:
Waxaa ku tartamaya oo kursigan u taagan:
1- Cabdi Axmed Dhuxulow
2- Iyo Nuur Xasan Guutaale
Musharax Cabdi Dhuxulow oo mar labaad doonaya in xilka loo doorto ayaa Baarlamaanka Galmudug ka codsaday inay codkooda siiyaan
Musharax Nuur Xasan Guutaale oo ah musharaxa ugu shactaradda badnaa khudbad jeedinta ayaa sheegay inuu yahay halgamaa, isla markaan ay Shabaab ku go’doomisay degmada Ceelbuur oo uu guddoomiye ka ahaa, wuxuuna si kaftan leh u yiri: “Waaya arag ayaan is heynaa, waxaan kala helnaa ayaan leenahay”
Kursiga 4-aad:
Waxaa ku tartamaya oo lagu qoray laba haween ah oo kala ah:
1- Samsam Daahir Maxamuud
2- Farxiyo Maxamed Guure
Samsam oo mar labaad dooneysa in xilkaasi loo doorto iyo gabadha la tartameysa ayaa xildhibaannada Baarlamaanka ka codsaday inay codkooda siiyaan
Kursiga 5-aad:
1- Cabdixakiin Macalin Maxamed
2- Ismahaan Cabdi Xuseen.
Xildhibaan C/xakiin ayaa laga soo wareejiyey Golaha Shacabka, isagoo u tartamaya Aqalka Sare, arrintaas oo uu ka shaqeeyay Madaxweynaha Galmudug si la isku weydaariyo kuraasta ay beesha xildhibaanka ku lahayd labada Aqal.
WAA SOCOTAA…
