Madaxweynaha Mareykanka Donald Trump iyo xaaskiisa Melania ayaa laga helay cudurka Coronavirus.
Arrintan ayaa waxaa shaaciyay isla Trump naftiisa isagoo qoraal kusoo qoray boggiisa Twitterka, wuxuuna qoraalkiisa ku yiri: “Caawa aniga iyo xaaskeyga waxaa nagala helay coronavirus, waxaana isku karaantiilay Aqalka Cad..”
Trump ayaa wax badan iska dhega tiray cudurkan, wuxuuna ku jeesjeesi jiray dadka xirta weji xirka, isagoo marar badan sheegay in cudurka uu yahay wax iska caadi ah oo aan dhibaato weyn lahayn inkastoo uu Mareykanka ku dilay dad ka badan 200,000 qof.
Trump ayaa lagu kari waayey inuu xirto weji-xirka la isaga ilaaliyo cudurkan wuxuuna ku jiray olole doorasho, isagoo dadka dhex geli jiray, isla markaana jebiyey dhammaan tallooyinkii dhaqaatiirta.
Xaaladda Trump ayaa la sheegay inay caadi tahay isla markaana aysan ka muuqan wax calaamado ah, taasoo ka dhigan in cudurka uu bilow ku yahay.
