Warar hordhac ah ayaa ka soo baxaya weerar qorsheysan oo xarakada Alshabaab ku qaadeen galabta Hotelka caanka ah ee Maka Al-Mukarama oo ah hotel ay siyaasiyiin iyo mas’uuliyiinta dowladda caadiyan isugu tagaan.
Weerarka ayaa ku bilowday Qarax weyn oo albaabka danbe ka dhacay, waxaana gudaha hotelka soo galay rag hubeysan aoo rasaas ku bilaabay dadkii ku sugnaa hotalka, kadibna degdeg u galay qolalkii ay dadku ku jireen oo kuwii furnaa ay rasaas la dhaceen.
Weerarka oo hadda socda ku dhowaad in ka badan 4 saacadood ayay ciidamada amaanku soo badbaadiyeen dad fara badan oo ku sugnaa gudaha hotelka waxaana dagaal culus ku dhex maray gudaha hotelka ragii weerarka soo qaaday iyo ciidamada gaarka ah ee nabadsugida.
[ad name=”HTML-2″]
Dad ka badan 15 ruux ayaa la sheegayaa inay weerarka ku dhinteen iyadoo qaar kale oo tiro badan dhaawacyo ka soo gaareen weerarkaasi. Dadka ku dhaawacmay waxaa ka mida Ambassadir Yuusuf Bari bari oo ahaa Safiirka Soomaaliya u fadhiya Switzerland. dhaawaciisa ayaa la sheegay inuu yahay mid culus.
Alshabaab ayaa sheegatay inay ka danbeysay weerarka, iyadoo ay ku soo beegantay iyadoo xaalad ammaanka lagu sugayo ka jirtay magaalada Muqdisho isla markaana dowladu dhowaan sheegtay inay qabatay saraakiisha Alshabaab u qaabilsaneyd caasimada Muqdisho.
Xaaladda ayaa weli isku qasan iyadoo dad badan oo mas’uuliyiin ka mid yihiin laga soo badbaadiyay markii jaranjaro loo saaray dariishadaha, waxaana saraakiisha ammaanka ay sheegeen in qof ka mida Alshabaab weli ku jiro hotelka oo hubeysan yahay.
Milkiilaha hotelka ayaa ku eedeeyay guddoomiyaha degmada Hodon inuu u diiday inay ammaanka hotelka sugaan oo dhagxaan waaweyn ku xiraan albaabyadooda. Khasaaraha weerarka ayaa la filayaa inuu sii kordho iyadoo dhaawacyada iyo dhimashada weli la daad gureynayo. Waxaa goor dhoweyd la xaqiijiyay inuu dhintay Allaha u naxariistee Yuusuf Axmed Ismaaciil (BariBari) safiirkii Soomaaliya ee Jineva oo ku dhaawacmay weerarka.
Wararkii ugu danbeeyay ayaa sheegaya in qofkii ugu danbeeyay kooxda weerarka soo qaaday la dilay oo sidaasina ay ciidamada ammaanka ku soo afjareen weerarkii 4 saacadood qaatay ee lagu qaaday Hotelka Maka Almukarama. Qasaaraha ka dhashay weerarka ayaa la tilmaamay mid ba’an.
Goobjooge.com
Muqdisho
[ad name=”HTML”]
[ad name=”HTML-5″]
[ad name=”HTML-4″]
