Dadweynaha Turkiga ayaa u dareeray doorashada dalkaasi ee madaxtinimada iyo Baarlamaanka dalkaasi oo mar qura dhaceysa, iyadoo ah doorasho lasoo hor mariyey markii dastuurka dalkaasi wax laga bedelay oo awood balaaran la siiyay Madaxweynaha dalkaasi.
Doorashadan ayaa noqon doonta tii ugu adkeyd ee uu loolan culus soo wajaho madaxweynaha shacbiyadda leh ee Recep Tayyip Erdogan oo isbedel weyn ku sameeyay dalka Turkiga, isla markaana caddow badan ku yeeshay dalalka waaweyn ee Carbeed iyo Reer Galbeedka.
Waxaa madaxweyne Erdogan oo muddo 15 sano ka badan talada dalkaasi soo hayey la tartamaya musharaxa isbahaysiga mucaaradka Muharrem Ince oo ah cilmaani ay siyaasaddiisu tahay garabka bidix dhexe.
Inkastoo Xisbiga Erdogan AK leeyahay shacabiyad, haddii ay doorashada adkaato ugu danbeyn la saadaalinayo inuu ku so baxo Erdogan, haddana waxaa la isku waafaqsan yahay inuu wajahayo loolankii ugu adkaa ee taariikhdiisa doorasho.
Recep Tayyip Erdogan oo ah nin islaami ah oo 64 sano jir ah wuxuu Turkiga ku sameeyay isbedel taariikhi ah, isagoo talada dalkaasi qabtay sanadkii 2002-dii, kadib markii ay dalkaasi muddo dheer gacanta ku hayeen xisbiyada cilaamiga ah.
Caddowga Erdogan waxay ku eedeeyaan inuu la so baxay awood xad dhaaf ah, isla markaana uu dalkaasi ku wado nidaam keli-talis ah, waxaana saxaafadda reer Galbeedka ka muuqda maqaallo iyo baaqyo loogu ololeynayo inuu Erdogan ku guuldarreysto doorashada maanta.
Saaxiibada Turkiga oo ay ugu horeeyeen dalalka Qatar iyo Soomaaliya ayaa dhinacooda ku jira Alle-bari iyo duco ay Recep Tayyip Erdogan u rajeynayaan inuu ku guuleysto doorashada Turkiga.
In ka badan 56 Milyan qof ayaa sharci ahaan codeynaya doorashada Turkiga, waxaana xalay soo dhammaaday olole doorasho oo la isku riiqday, saadaasha ahaa ah in Recep Tayyip Erdogan uu guuleysan doono xitaa haddii loo baahdo wareeg kale oo doorasho oo dhici doonta 8-da July.
