Tan iyo wixii ka danbeeyay weerarkii degaanka Bariire ee dadka lagu laayay waxaa mar qura is bedelay taageeradii madaxda dowladda Soomaaliya ka heystay dadka gaar ahaan kuwooda adeegsada baraha bulshada.
Arrintay waxay cirka isku shareertay markii dowladda Soomaaliya ay Itoobiya u gacan gelisay sarkaalkii ONLF ee C/kariin Qalbi-dhagax waxaana Baraha bulshada ka dhacay wax lagu tilmaami karo kacdoonkii ugu weynaa ee Soomaali ka fal celiso tallaabo ay dowladdu ku dhaqaaqday.
Kiiskan wuxuu dib u soo nooleeyay Soomaalinimo iyadoo dadka ugu badan ay ka xanuunsadeen in qof Soomaali ah dowladiisa u gacan geliso Itoobiya, waxaana 98% dadka baraha bulshada adeegsada ay ka hor u yimaadeen madaxweynaha Soomaaliya iyo Ra’iisal wasaaraha.
Faallooyin laga sameeyay hambalyadii ciidul adxaa ee ay barahooda ku qoreen madaxweyne Farmaajo iyo Ra’iisal wasaare Kheyre waxaa laga dheehday boqolaal qof oo kan ugu yar uu weydiinayo halkii ay geeyeen C/kariin Qalbidhagax, halka qaar kale ay sheekadu la gaartay lacnad iyo haddalo ka darran.
Dadka ku haray taageerada madaxda sare ee dowladda Soomaaliya ayaa noqday kuwa loo shaqaaleeyay dacaayad u sameynta madaxda, qaar la kireysay, qaar qabyaalad darteed shar iyo kheyr ku raacsan iyo qaar yar oo u baqaya dowladnimada.
Dowladii shacabka ee Farmaajo iyo tageeradii weyneyd ee baraha bulshada ay ku lahayd waxaa isku fuuqsaday kiiska Qalbi dhagax, waxayna mar kale dadka ka aamin baxeen markii ay awoodi waayeen inay si cad umadda u hor yimaadaan oo runta u sheegaan ugu yaraan.
Qaar baa ku doodaya in madaxweynaha la khiyaamay, kuwo kale ayaa difaac ka dhigtay in sarkaalka la dhiibay uu Itoobiyaan ah, qaar kalena waxay sheekadu la gashay Itoobiya ayaa fashilineysa madaxdii dadku jeclaa.
Waa yaabe sidee madaxweyne umad dhan dooratay loo khiyaami karaa oo kiis intaas la eg looga hoos bixin karaa??!, haddiise uu sidaasi ui jilcan yahay sidee dalkan ku hoggaamin karaa?. Haddii Qalbidhagax Itoobiyaan yahay, Imisa wasiir iyo madax oo ka mida dowladda Soomaaliya ayaa Itoobiyaan noqon doona, lana dhoofin doonaa? maxaase dowladda Soomaaliya iyo sirdoonkeeda ku qasbay kiis ay ka maarmi kareen?. Waxa ugu horeeya ee madaxweyne Soomaaliyeed laga filayay waxay ahayd inuu la yimaado siyaasad uu damaca iyo shiqoolada Itoobiya kula tacaali karo, haddii kii la doortay uu lix bilood qura ugu gacan galay… aaway amaanadii loo dhiibtay iyo kartidii lagu doortay..?
Marka xaqiiqada la waayo waxaa suuqa qabsada wax kasta oo buuxin kara, waxaana war noqda qodob kasta oo kuwa qarinaya lidi ku ah, waana taas halka ay arrintu beeshay… iyadoo aan joogno duni aan xaqiiqada la oodi karin.
HOOS KA AKHRISO WEERARKA BARAHA BULSHADA EE KU SOCDA FARMAAJO & KHEYRE
MADAXWEYNAHA
Kheyre
RA’IISAL WASAARAHA
Ciid Mubaarak Ummada Muslimka ah gaar ahaan Shacabka Soomaaliyeed Meel Kastoo aad joogtaan Ku Ciida Nabad iyo Farxad.#NabadIyoNolol pic.twitter.com/uPVVhVXCh9
— OPM Somalia 🇸🇴 (@SomaliPM) September 1, 2017
