Wasiirka Arrimaha Dibadda Dadlka Jabuuti Maxamuud Cali Yuusuf ayaa farriimo is daba joog ah ku qoray baraha bulshada, isagoo adeegsaday luqada Carabiga, wuxuuna sheegay in Boqortooyada Sacuudiga ay kaalin udub dhexaad ah ka qaadatay heshiisiinta dalalka Jabuuti iyo Eritrea, isagoo bogaadin fara badan ku dhoobay.
Wasiirka dibada Jabuuti ayaa xusay in socdaaladdii uu Wasiirka Arrimaha dibadda Sacuudiga Caadil Aljubair ku tegay magaalooyinka Addis ababa iyo Asmara ay qeyb weyn ka qaadatay in la isu soo dhoweeyo dalalka Jabuuti iyo Eritrea, wuxuuna intaas ku daray in Sacuudiga uu sidoo kale ka shaqeeyay heshiisiinta dalalka Itoobiya iyo Eritrea, si dalalka Geeska Afrika iyo Khaliijka ay iska kaashadaan sugidda amnigooda, ayna yeeshaan iskaashi dhinaca amniga ah.
“Dowladda Jabuuti waxay si weyn u bogaadineysaa dhexdhexaadinta ay hadda Boqortooyada Sacuudiga ka dhex wado xaaladii ka dhaxeysay dalalka Jabuuti iyo Eritrea, waxaan kaloo xaalad nabadeed abuuray dadaalka uu waday Ra’iisal wasaaraha Itoobiya” ayuu qoraaladiisa ku yiri wasiirka arrimaha dibadda Jabuuti Maxamuud Cali Yuusuf.
Mar uu ka hadlay kaalinta dowladda Soomaaliya ayuu ugu danbeyn yiri Wasiirka: “Shaki kuma jiro in dadaalka dowladda Federaalka Soomaaliya iyadoo mahadsan uu qeyb ka ahaa dadaalka dowladaha Geeska Afrika ugu jiraan in la gaaro nabad guud oo aan dalna laga tegin..”
Maxamuud Cali Yuusuf wasiirka arrimaha dibadda Jabuuti ayaa u muuqda inuu kashifay dowladda ka danbeysa isbedellada ka dhacaya Geeska Afrika iyo ujeedka lagu doonayo in iskaashi milateri ay sameystaan dalalka Geeska Afrika iyo Khaliijka ay hoggaamiso Sacuudiga, halka doorka dowladda Soomaaliya uu ka dhigay mid ka daba tuur ah.
