Guddoomiyaha Guddiga Gurmadka magaalada Beledweyne Xaaji Cusmaan Dhagaxow Haruur ayaa kashifay in dowladda Soomaaliya aysan wax gacan ah ku lahayn howsha biyo xireenka magaalada Beledweyne ee looga hortegayo fatahaadda Webiga Shabeelle.
Isagoo u warramay VOA-da ayuu sheegay in Guddigooda ay ku howlgaleen lacag dhan 530,000 doolar oo 400-kun oo ka mida ay ahayd lacagtii ka timid Somaliland ee lagu taageeray fatahaadii hore iyo 130-kun oo ganacstada Beledweyne ay iska ururiyeen, iyadoo muddo laba toddobaad ah ka shaqeeyay inay Kelli ka sameeyaan duleedka magaalada ayna biyo ka weeciyaan.
Xaaji Cusmaan Dhagaxow oo dhinaca kale ah Guddoomiya Dahabshiil Group ee Gobolka Hiiraan ayaa caddeeyay in dowladda Soomaaliya ay shalay geysay magaalada Beledweye 500 Jawaab oo carro lagu shubo, mana jiraan ayuu yiri wax kale oo kasoo gaaray maamulka Hirshabeelle iyo dowladda Federaalka.
Xaajiga wuxuu qarxiyey inaysan weli magaalada Beledweyne soo gaarin lacagtii ay dowladda Soomaaliya shaacisay inay ugu deeqday fatahaaddii Beledweyne ka dhacday Bishii Oktoobar ee sanadkii hore 2019 oo gaareysay 500,000 doollar iyo lacagtii Jabuuti ee ahayd 600,000 doolar oo kaliya ay ka maqleen Idaacadaha; iyagoo marar badan arrintaas soo qaaday aan wax jawaab ah laga siin.
“Wax dowladda naga soo gaaray waxaa ka jira 500 jawaanno ah.. sanadkii hore waxay dowladdu ku yaboohday 500-kun Doollar nama soo gaarin.. wax aan hadal ahayn kama heyno.. cidda lacagtaas cuntay ama loo dhiibay iyagaa la weydiinaa..” ayuu yiri Xaaji Cusmaan dhagaxow oo caddeeyay in dowladda Federaalka aysan wax gacan ah ku lahayn howsha ka socota magaalada Beledweyne.
Lama oga halka ay martay lacagtii dowladda Federaalka shaacisay inay siisay fatahaadii magaalada Beledweyne Oktoobar 2019, waxayna arrintan ka dhigan tahay fadeexad looga fadhiyo dowladda Soomaaliya inay caddeyn ka bixiso.
Arrintan ayaa soo shaac baxeysa iyadoo Wasiiro ka tirsan dowladda Federaalka ay tageen magaalada Beledweyne, isla markaana wasiirka Boostada xukuumadda Soomaaliya uu sheegay inay dowladda Federaalka iyo maamulka Hirshabeelle dhisayaan biyo xireen looga hortegayo fatahaadda Beledweyne.
HOOS KA DHAGEYSO WAREYSIGA XAAJI CUSMAAN DHAGAXOW EE VOA-DA
HOOS KA DAAWO HOWSHA BIYO XIREENKA BELEDWEYNE
