Waxaa mar kale soo shaac baxay is canbaareyn iyo warar iska horjeeda oo hawada la isku marinayo kuwaasoo quseeya garsoorka dowlada Federaalka Soomaaliya oo ah hay’adda kaliya ee kamida kuwa ugu waaweyn dalke ee aan sal dhigin kadib dhismihii dowladda Federaalka ee rasmiga ah September 2012.
Guddoomiyaha Maxkamadda sare Ceydiid Cabdullahi Ilkaxanaf ayaa sharci darro ku tilmaamay ninka loo magacaabay xeer ilaaliyaha guud ee Qaranka Axmed Cali Daahir oo xilkaasi si la yaab leh ugala wareegay xeer ilaaliyihii hore C/qaadir Mohamed Muuse oo isagu diiday inuu xilka wareejiyo, sidaasoo ay ku taageereen golaha adeegga Garsoorka. Ilka xanaf wuxuu sheegay inuusan dastuurka ku qorneyn xeer ilaaliye oo aanu jirin, balse uu jiro oo kaliya garyaqaanka guud ee Qaranka.
Hadalka guddoomiyaha Maxkamadda sare ayaa ka dambeeyay markii xeer ilaaliyaha cusub Axmed Cali Daahir uu sheegay in Garoosaraaysha ka shaqeeya Maxkamadaha Dalka ay yihiin kuwo Sharcidaro ah islamarkaana aan lagu soo magacaabin ku joogin wareegto Madaxweyne, wuxuna intaas ku daray in ilaa 30 Garsoore oo ka shaqeeya Maxkamadaha dalka ay sharci darro ku howlgalaa, iyagoo jooga Maxkamada Gobolka iyo Racfaanka.
Isqabsiga cusub ayaa salka ku haya wax ka bedel la doonayo in lagu sameeyo garsoorka oo muddo soo jiitamayay, isbedelkaas oo uu hogaanka u hayo wasiirka Garsoorka Faarax Sheekh C/qaadir ayaa ku jira marxaladihii ugu danbeeyay, taas ayaana la filayaa inay ka dhalatay qeylo dhaanta guddoomiyaha Maxkamadda sare oo aaminsan in Golaha adeegga garsoorka ee ahayd in la dhiso uu dhisan yahay.
30 June 2014 ayaa Baarlamaanka Soomaaliya ansixiyay hindise-sharciyeedka magacaabista Guddiga Adeegga Garsoorka, kaasoo dhabaha u xaaraya in isbeddel lagu sameeyo adeegga garsoorka iyo hoggaanka maxkamadaha, isla sharcigaas waxaa ka soo horjeestay guddoomiyaha Maxkamadda Sare.
Waxaa la is weydiin karaa labadan mas’uul midka sharciga ku taagan iyo kan sharci darro ah? Guddoomiyaha maxkamadda sare waa mas’uul ka haray dowladii KMG ahayd, wuxuuna meesha ku joogay waxqabad la’aanta dowladda oo xitaa fulin weyday go’aanadii shirweynihii qaran ee garsoorka oo Muqdisho ka dhacay April 2013. Sidoo kale xeer ilaaliyaha Qaranka oo golaha wasiirada ansixiyeen madaxweynuhuna soo magacaabay ayaa u muuqda nin nidaam ahaan sharci ku jooga laakiin shaki weyn laga qabo inuu u adeegayo dano gaara.
Waa calaamad kale oo muujineysa sida ay u kala raaracaan hay;adaha dowladda iyo is heysadka aan xadka lahayn ee faraha ka sii baxaya, tiiyoo aanu muuqan hogaan sare oo arrimahan awood u leh inuu xaliyo inta aysan dibadda u soo shaac bixin oo bulshada werwer ku abuurin hadba laba ma’suul dowladeed oo warbaahinta ku dagaalamaya.
Wadani Info.
Muqdisho
