Madaxweynihii hore ee Soomaaliya Xildhibaan Xasan Sheekh Maxamuud ayaa madaxda dowladda Soomaaliya ugu baaqay inay qaataan dhaliilaha loo jeedinayo, lagana rabo inay saxaan khaladaadka laga sheego.
“Masuuliyadda dadka ay saaran tahay waa madaxda dowladda, waxaa laga rabaa inay la yimaadaan wax soo saar dhinac kasta ah, waxaan qabaa mucaaradnimadu ma xuma, hadii ay tilmaamayaan waxa khaldan waa inay dowladdu saxdaa, dalkan waa dal dimoqraadi ah, dowladda meeshii ay ka gaabisay waa loo sheegayaa, meeshii ay hormarisayna waa lagu ammaanayaa”. ayuu yiri Xasan Sheekh.
Isagoo magaalada London kula hadleyay dadweyne soo dhoweyn u sameeyay ayuu shegay dadka xukuumada aan ku jirin inay saaran tahay masuuliyad wadareed, balse masuuliyadda gaarka ah saaran tahay xukuumadda, baarlamaanka iyo madaxweynaha, sida uu yiri.
Wuxuu ugu baaqay dowladda in looga baahan yahay inay la timaado siyaasad furfuran oo ay kula dhaqanto mucaaradka, islamarkaana ay qaadato dhaliisha ku aadan hawlaha ay ka gaabisay.
Maamulkii uu madaxda ka ahaa Madaxweynihii hore ee Xasan Sheekh Maxamuud ayaa lagu xusuustaa inuusan aqbali jirin dhaliilaha mucaaradka, iyadoo dowladiisa ay dagaal kula jirtay warbaahinta.
