Isbaheysi loogu magac daray Golaha Badbaadada Qaranka ayaa maanta looga dhawaaqay magaalada Muqdisho. Isbaheysigan waxaa ku bahoobay xildhibaanno gaaraya 100 oo ka tirsan Baarlamaanka Soomaaliya inkastoo shirkii looga dhawaaqay golaha cusub ay goobjoog ahaayeen ilaa 50 xildhibaan. Xildhibaanadan ayaa ahaa kuwii taageersanaa Ra’iisal wasaaraha kalsoonida lagala noqday xukuumadiisa ee C/weli Sheekh Axmed.
Ujeedada Golahan ayaa lagu sheegay sidii loo difaaci lahaa qaranimada Soomaaliya, isla markaana looga hortegi lahaa inay talada dalka la wareegto koox yar oo la sheegay inay madaxweynaha ku xeeran yihiin. Shir ay maanta ku yeesheen Hotelka Hayaat oo fadhi u ah xubnahan ayaa lagu ansixiyay xeer la sheegay in lagu dhaqyo Golaha Badbaadada Qaran, kaasoo la ansixiyay, waxaana la magacaabay guddoonka Golaha oo kala ah:
Xildhibaan Cabdi Axmed Dhuxuloow (Dhegdheer) Gudoomiy Golaha Badbaadada Qaran
Xildhibaan Saciid Maxamed Cali (Saciid Dheere) Gudoomiye Ku xigeenka 1-aad
Xildhibaan Cabdirisaq Cusman Xasan (Jurile) Gudoomiye ku xigeenka 2-aad
Xildhibaan Cabdullahi Xuseen (Coonka) Xoghaye guud
iyo Afhayeenka Xildhibaan Bishaar Ugaas . waxaa kaloo la sheegay in la dhisayo guddiyo hoosaadyo ka kooban lix qeybood oo howlaha Golahan wadi doona. waxaana goobta lagu dhaariyay xubnaha la doortay marka laga reebo afhayeenka oo goobta ka maqnaa.
Dhismaha Golaha oo ah isbaheysi dantu kulmisay ayaan la ogeyn meesha uu ku dambeyn doono iyadoo loolan loogu jiro iminka magacaabida Ra’iisal wasaaraha iyo jagooyinka cusub ee Golaha wasiirada soo socda. Xildhibaanada taageersan madaxweynaha ayaa u arka golahan inuu yahay sharci darro oo aanay suuragal ahayn in Baarlamaanka dhexdiisa laga sameeyo isbaheysiyo, tiiyoo aan la gaarin dhismaha xisbiyadii siyaasadeed.
Wadani.com
Muqdisho-Somalia
[ad name=”HTML”]
