Madaxweynaha Jubbaland Axmed Maxamed Islaam ayaa lagu wadaa inuu soo saaro go’aan cad oo uu ku diidan yahay aqoonsiga kala dhiman ee Madaxweynaha Soomaaliya.
Qoraal jawaab ah ayaa la sheegay inuu kasoo bixi doono Axmed Madoobe, kaasoo lagu diidan yahay go’aankii maanta kasoo baxay Madaxtooyada Soomaaliya oo Madaxweyne KMG ah muddo 2 sano u aqoonsatay Axmed Madoobe.
Axmed Madoobe ayaa diidan wax ka yar madaxweyne la doortay Ogost 2019 oo muddo xilkeedkiisu yahay sidii loo doortay muddo 4 sano ah, waxaana si buuxda ugu gacan seyri doonaa aqoonsiga kala dhiman ee Madaxweyne Farmaajo.
Madaxtooyada Soomaaliya ayaa ku jirta xaalad adag oo aan u saamaxeynin inay loolan siyaasadeed gasho xilligan oo Madaxweyne Farmaajo uu ku jiro kala-guur, ayna cadaadis ku hayaan Beesha caalamka.
Qoraalka Madaxtooyada ee quseeya Axmed Madoobe ayaa laga soo calaamadeeyay inuusan ku dhisneyn wax sharci ah, madaxweyne Farmaaja-na aanu magacaabi karin maamul KM G ah mid jirina ka dhigi karin KMG, wuxuuna ku dhisnaa sida ka muuqata qaab madaxweynaha siyaasaddu ku ciirtay qiil loogu sameeyo.
Puntland iyo Jubbaland ayaa ka mideysan inay cadaadis hor leh saaraan Madaxweyne Farmaajo oo guul siyaasadeed ay hadda ka heleen muddo dheer kadib oo loolan adag dhex maray, taasoo ay arkaan jab siyaasadeed oo caddowgoodii ku dhacay.
