Ra’iisal wasaaraha xukuumadda Soomaaliya ayaa ku dhex jira cadaadisyo siyaasadeed oo uga yimid dhinacyo kala duwan.
Ra’iisal wasaare Xasan Cali Kheyre oo 4 bilood ay u dhammaatay xukuumadiisa ayaa culeysyo waaweyn kasoo wajaheendhinacyada kala ah: Madaxweyne Maxamed C/llaahi Farmaajo iyo xildhibaanada Baarlamaanka Federaalka.
Madaxweyne Farmaajo ayaa Ra’iisal wasaaraha ku wareejiyay xiriirka dalka Itoobiya isagoo u xil saaray inuu ka qeybgalo shirarka ka dhaca dalka Itoobiya, taasoo keentay in markii labaad uu Mudane Kheyre shir heer madaxweyne ah ku metelayo Farmaajo magaalada Adis ababa.
Madaxweynaha Soomaaliya ayaa la sheegay inuu xasaasiyad badan ka qabo safarrada Itoobiya, isagoo ka baqaya in loo arko mas’uul u dhow Itoobiya, taasoo uu ku weyn karo shacbiyad badan, waxayna arrintan ku dhalisay inuu Ra’iisal wasaaraha u diro shirarka Adis ababa inkastoo uu ka caga jiiday Xasan Cali Kheyre.
Culeyska labaad ee heysta Ra’iisal wasaare Kheyre ayaa ah isku shaandheyn la sugayo inuu ku sameeyo golihiisa wasiirada oo uu hore u balanqaaday intii aan codka kalsoonida la siin xukuumadiisa, waxaana weli la buuxin xilkii uu ka geeriyooday Wasiirkii Howlaha Guud ee lagu dilay Muqdisho.
Xildhibaano ka mida kuwa ugu saameynta badan ayaa bilaabay inay Mooshin caga-jugleyn ah ka hadlaan xilligan, waxaana Ra’iisal wasaare Kheyre laga sugayaa inuu la yimaado siyaasad uu uga badbaado xildhibaanada mooshin ku noolka ah.
Wadani
