Ra’iisal wasaaraha xukuumadda Soomaaliya Cumar C/rashiid ayaa caawa maqribkii shir degdeg ah xarunta Villa Hargeysa ee fadhiga guddoonka Baarlamaanka kula yeeshay Guddoomiyaha iyo guddoomiye ku xigeenada Baarlamaanka Maxamed Sheekh Cusmaan, Jeylaani Nuur Iikar iyo Mahad Cawad.
Shirka oo uu dalbaday Ra’iisal wasaaraha ayaa ku saabsanaa fadhiga berito ee la filayay in codka kalsoonida loo qaado xukuumadda cusub. Ra’iisal wasaaraha ayaa ka codsaday guddoonka Baarlamaanka inay siiyaan waqti dheeraad ah, taasoo ay u sheegeen inaysan suuragal ahayn.
Dood dheer kadib wuxuu Ra’iisal wasaaraha u sheegay guddoonka Baarlamaanka inuu kala dirayo xukuumadiisa, kadibna bilaabayo la-tashiyo cusub oo uu xukuumad kale ku soo dhisayo una baahan yahay waqti in loogu daro maadaama ay dhamaaneyso waqtigii xukuumad dhisidda.
Guddoonka Baarlamaanka ayaa ka dalbaday Cumar C/rashiid inuu qoraal ahaan ugu keeno inuu kala diray xukuumadii uu dhowaan magacaabay, kana baahiyo warbaahinta, kadibna ay la wadaagi doonaan baarlmaanka, markaas kadib oo waqti cusub la siin doono si uu usoo dhiso xukuumad cusub.
Ra’iisal wasaare Cumar C/rashiid ayaa dib ugu laabtay xafiiskiisa goor dhoweyd iyadoo la filayo inuu la-tashi la sameeyo madaxweynaha iyo kooxdiisa kadibna uu go’aanka ugu danbeeya ka qaato arrintan. Wararkii ugu danbeeyay ee xafiiska Ra’iisal wasaaraha kasoo gaaraya Wadani.com ayaa sheegaya in Ra’iisal wasaaraha uu hadda ku howlan yahay qoraalka warqadii uu kala diri lahaa xukuumadda magacaaban 5-ta maalmood.
Tani waxay soo afjareysaa mucaaradnimo weyn oo xildhibaan ka badan 120 kala hor yimaadeen xukuumadda cusub, waxayna albaabada u fureysaa loolan iyo xusul duub cusub oo ku saabsan dhismaha xukuumad cusub oo la filayo inay ka sii adkaato sidii ay markii hore ahayd.
Labada isbaheysi ee xildhibaanada kasoo horjeeda xukuumada cusub iyo madaxweynaha ayaa si halhaleel ah ugu qulqulay Villa Hargeysa si ay goobjoog uga noqdaan geerida xukuumadii ay ololaha ku qaadeen, waxaana socda doodo ku saabsan sida loo dhisayo xukuumada cusub iyo shuruudo la doonayo in lagu xiro Cumar C/rashiid si aan mar kale xukuumada ka la dhisi doono loogu soo darin shaqsiyaad la diidan yahay qaarkood.
Wadani.com
Muqdisho
[ad name=”HTML”]
