Xubnaha wasiirada, wasiir ku xigeenada iyo wasiiru dowleyaasha uu magacaabay Ra’iisal wasaaraha xukuumadda Soomaaliya Soomaaliya ayaa la sheegay inay dhammaantood yihiin xildhibaanno marka laga reebo hal mas’uul oo kaliya.
Magacaabiddan oo in muddo ah la sugayey ayaa waxaa saameyn weyn ku yeelatay ololihii ay xukuumadda hormuudka ka ahayd ee keenay inuu is casilo guddoomiyihii Golaha Shacabka Maxamed Sheekh Cismaan (Jawaari) oo xubno ka mida ahaa xukuumadda ay isku casileen si ay xilkaasi ugu tartamaan.
Afar arrimood oo ka dhashay magacaabiddan hoos ka akhriso:
1- Xubnaha 13-ka xubnood ee ka mid noqday Golaha Wasiirada ayaanay ku jirin qof Haween ah, iyado ay taasi ka hor imaaneyso qaabkii markii hore loo magacabay xukuumadda oo lix wasiir ah ku lahaayeen haweenku.
2- Waxaa sii kordahy safaaradaha danjire la’aanta ah oo markii hore ahaa 12, haddana noqday13, markii safiirkii Somalia ee Sacuudga Daahir Maxamuud Geelle oo loo magacaabay Wasiirka Warfaafinta.
3- Wasiirka kaliya ee magacaabiddan ku baxay, xilkana laga qaaday ayaa noqday Wasiirkii Howlaha Guud iyo guryeynta Saadaq Cabdullahi Cabdi 9 bilood xilkan hayey iyadoo lagu booskiisa loo magacaabay C/fataax Geeseey.
4- Wasaaradda Gaashaandhigga waxaa ay yeelatay Wasiirkii saddexaad muddo sanad iyo bil ah, waxaana ay tahay Wasaaradda ugu badan ee isbeddeladda Xukuumadda Kheyre ay saameynta ku yeesheen.
