Guddiga Qaramada Midoobey u qaabilsan Cunaqabateynta hubka ee Somalia iyo Eretria ayaa warbixin ay kasoo saareen dhowaan ku kashifay halka laga keeno qalabka laga sameeyo qaraxyada ka dhaca Soomaaliya.
Warbixinta ayaa sheegtay in Sharikad fadhigeedu yahay dalka Hindiya ay sameyso waxyaabaha qarxa ee inta badan lagu fuliyo weerarrada ka dhaca Soomaaliya. waxayna intaas ku dareen Kooxda dabagalka ee Monitoring Groupin qaraxyadii ugu badnaa ee Sanadihii la soo dhaafay ka dhacayay Soomaaliya lagu fuliyay agabyo waxyaabaha qarxa ah oo lagu farsameeyay Dalka Hindiya, waxaana Al-shabaab loo soo mariyay dhinac Badda.
Warbixinta kooxda dabagalka ee Qaramada Midoobey u qaabilsan Soomaaliya iyo Eritrea ayey ku sheegeen in bilihii April iyo May ee Sanadkan 2017 ay heleen Waxyaabaha qarxa oo laga soo dhoofiyay Hindiya laguna qabtay Puntland. Qalabka la qabtay ayaa lagu sheegay in ay farsameysay Sharikadda C-Det, taasoo sameysa waxyaabaha qarxa, agabka Korontada iyo Tignolojiyadda.
Kooxda dabagalka Q/Midoobay ee Monitoring Group ayaa sheegtay in tan iyo 2013-kii ay la ay qalabkaasi Alshabaab uga soo degayeen inta u dhaxeysa Magaalooyinka Laas-Qoray iyo Qandala Al-shabaab.
Warbixintu waxay kaloo sheegtay in labo of oo midkood yahay Soomaali, kan kalena ka tirsan yahay Baarlamaanka Maamulka Somaliland oo lagu magacaabo Maxamed Axmed Maxamuud iyo Anwar Axmed oo Jabuuti uga diiwaan geshan sirdoon ayaa u sheegay kooxda dabagalka in Hubka Hindiya lagu farsameeyay ee Al-shabaab loo soo mariyay Dalka Yemen sidoo kalena la soo gaarsiiyay xeebaha Qandalada iyo Laas qorey.
Waxaa kale oo ay warbixinta xaqiijineysaa in Bangi laga leeyahay Dalka Yemen uu fududeeyay bixinta lacagta xamuulka ah ee Hubka lagu soo daabulo, kaasoo Magaciisa lagu sheegay Salba Islamic Bank oo ku yaalla Sanca.
Bishii July ee 2013 Qaraxyo ka dhacay magaalada Marko oo Shabeellaha hoose ah iyo Degmada Hodon ee Muqdisho ayaa Kooxda dabagalku sheegtay inay ka heshay haraadiga qaraxyadaas in ay farsameysay Sharikadda C-Det ee Dalka Hidniya.
