Jabhadda ONLF ayaa shaacisay war ku saabsan sii deynta sarkaalka C/kariin Sheekh Muuse (Qalbi-dhagax) oo shalay la sheegay inuu xoriyadiisii dib u helay kadib muddo sanad ku dhow oo Itoobiya loo gacan geliyay.
Afayeenka Jabhadda Dib u Xoreynta Soomaali Galbed ee ONLF C/qaadir Xasan Hirmooge Caddaani ayaa sheegay in C/kariin Qalbi Dhagax aanu weli Xor aheyn. laakiin uu magan u yahay Odayaal uu sheegay inay wadato Dowladda Itoobiya oo arrintiisa gacanta u haya.
Afhayeenka ayaa caddeeyay in 20 maalmood kahor Qalbi Dhagax laga saaray Xabsigii uu ku jiray kadibna la geeyay Guri aad loo ilaaliyo oo ku yaala Magaalada Adis Ababa ee Caasimadda Itoobiya halkaasina SAWIRRO lagula soo galay si loo sheego inuu xor yahay, balse aan wali la sii deyn.
“C/kariin Qalbi-dhagax wuxuu ahaa siyaasi u xirnaa dowladda Itoobiya, in odayaal uu magan u ahaado ma ahan, in sii deyn.. arrimahaasi waa wax ka baxsan nidaamka maxaabiista, 20 maallmood ka hor ayaa laga sii daayay xabsiga oo lagu hayay, C/kariin waa inuu helaa xoriyadiisa siyaasiga ah.” afhayeenka ONLF oo u warramay VOA-da.
Arrintan ayaa soo baxeysa iyadooo odayaal ay isku beel yihiin Qalbidhagax ay shaaciyeen sawirradiisa, isla markaana lagu arkay wadooyinka magaalada Addis. Suldaan Fowzi Maxamed oo ah Suldaanka C/kariin Shiikh Muuse ayaa sheegay in C/kariin ay wada joogaan Hotel ku yaala Addis abab, lana siiyay Xorriyad uu ku dhaq-dhaqaaqi karo.
C/kariin Qalbi-dhagaxa yaa la sheegay inuusan ka bixi karin Itoobiya, waxayna Itoobiya dejisay qorshe ay ku dooneyso inuu qeyb ka ahaado heshiis ay dooneyso inay la gasho jabhadda ONLF, sidaas darteedna uu sii joogi doono Itoobiya.
